Belgili qoǵam qaıratkeri, memlekettik qyzmet salasynyń ardageri Ersultan Bekturǵanovtyń bul kitaby baqyttyń kilti eńbekte ekenin dáripteıdi, dep jazady Egemen.kz.
Jańa týyndy Astanadaǵy «Dostyq» úıinde tanystyryldy.
«Folıant» baspasynan shyqqan, estelik-esse túrinde jazǵan bul kitapta avtor balalyq shaǵynan qazirge deıingi ǵumyr jolyndaǵy eleýli oqıǵalardy baıandap, ómirlik tájirıbesin bólisedi.
Sondaı-aq adam boıyndaǵy basty qasıetter – adaldyqty, eńbeksúıgishtik pen kishipeıildilikti basty qundylyq retinde kórsetip, oqyrmandardy kezdesken qıyndyqtardy jeńip, qashanda jaqsylyq jasaýǵa shaqyrady.
- Ersultan Bekturǵanovtyń jańa kitabyn eki kún bas almaı oqyp shyqtym. Oqyp otyryp, elde júrgen kezdegi ózim de bilmeıtin nárselerime qanyqtym. Búkil Bekturǵanovtar áýletiniń jaqsy isterin, jaqsy qasıetterin, ónegeli isterine kýá boldym. Túıindep aıtqanda, bul kitap adaldyqty, adamgershilikti tý ete otyryp, urpaqtardy otanshyldyqqa, eńbeksúıgishtikke shaqyrady, - dedi jıynda sóz alǵan aýdarmashy-jýrnalıst Esenqul Safýanı.
Al avtor jańa kitabynda ómirdiń mánin de, qunyn da, baqytyn da eńbekten tapqanyn aıtqysy kelgenin atap ótti.
- Adal eńbek abyroıǵa jeteleıtini anyq. Taǵylymdy oılar men qyzyqty oqıǵalardy arqaý etken bul kitabym óskeleń urpaqqa tárbıe berip, jol kórsetýde paıdasy tıedi degen oıdamyn, - deıdi ol.
Ersultan Bekturǵanov Jambyl jeńil jáne tamaq ónerkásibi tehnologııasy ınstıtýtyn (qazirgi M.H.Dýlatı atyndaǵy óńirlik ýnıversıteti), Dıplomatııalyq akademııany bitirgen. 1-synypty keńesshi degen dıplomatııalyq dárejesi bar.
Eńbek jolyn qarapaıym jumystan bastaǵan ol keıin QR Syrtqy ister mınıstrliginiń hatshysy, Qazaqstannyń Germanııadaǵy elshiliginiń konsýly, QR Prezıdenti Ákimshiliginiń kadr saıasaty bóliminiń meńgerýshisi boldy.
2012 jyly qańtar aıynda Qazaqstan Respýblıkasy Parlamenti Májilisiniń depýtaty bolyp saılanyp, V-VI shaqyrylymdarda abyroıly qyzmet atqardy.
Qajyrly eńbegi memleket pen qoǵam tarapynan joǵary baǵalanyp, «Eren eńbegi úshin» medalimen, «Qurmet», «Parasat» ordenderimen marapattaldy.
Eki ret Prezıdenttiń alǵysyn alyp, keýdesine «Altyn barys» belgisin taqty.