Almaty oblysynyń tabıǵat qorǵaý prokýratýrasy sý resýrstaryn basqarý salasynda memlekettiń múddelerin qorǵaý boıynsha aýqymdy jumys júrgizdi. Nátıjesinde 8 sý qoımasy memlekettiń menshigine qaıtaryldy, dep habarlaıdy Egemen.kz.
Bas prokýratýranyń habarlaýynsha, qadaǵalaý qyzmeti barysynda senimgerlikpen basqarýshylar tarapynan buzýshylyqtar anyqtalǵan. Olar 8 sý qoımasynyń tıisti tehnıkalyq jaı-kúıin saqtaý jónindegi sharttyq mindettemelerdi elemeı, sý sharýashylyǵy júıeleri men qurylystaryna tekserý júrgizbegen.
«Bul jaǵdaılar halyqtyń ómiri men densaýlyǵyna, qorshaǵan ortaǵa da keri áser etýi múmkin. Qabyldanǵan sharalardyń arqasynda josyqsyz basqarýshylarmen 8 shart buzyldy, al 20 mlrd teńgeden astam somanyń múlki memleket menshigine qaıtaryldy», delingen habarlamada.
Qazirgi tańda prokýrorlyq qadaǵalaý aktisi boıynsha ýákiletti organdar sý obektilerin kóp faktorly tehnıkalyq tekserý boıynsha jumys júrgizip jatyr.