Túzetýler azamattyq qorǵaý qyzmetkerleriniń áleýmettik mártebesin arttyrýǵa jáne adam kóp jınalatyn obektilerdi qabyldaý kezindegi órt qaýipsizdigin baqylaýdy jańartýǵa baǵyttalǵan, dep jazady Egemen.kz.
Salaǵa qatysty zań jobasy Májilistiń erteńgi jalpy otyrysynda talqylanady. Zań jobasyndaǵy basty jańalyq - qutqarýshylardy baspanamen qamtý bolyp otyr. О́ıtkeni jaýapkershiligi joǵary sala mamandaryn áleýmettik qoldaý osy kúnge deıin kemshin qalyp kelgen.
QR Parlamenti májilisiniń depýtaty Erbolat Satybaldınniń aıtýynsha sońǵy úsh jylda elde 4406 adam jumys ornynda jaraqat alsa, byltyr 131 adam qaza tapqan. Bul óte qaýipti jumys ornynda tekserister júzege asyp turýy kerektigin kórsetedi.
«Prezıdentimiz elimizge áskerılengen taý-ken qutqarýshylarynyń qajet ekenin aıtty. Burynǵy ýaqytta bul úlken óndiris oryndarynda mindetti bolǵan. Keshegi Qaraǵandyda kómir shahtasynda bolǵan úlken apattarda sol áskerılengen qutqarýshylardyń qajettiligi týyndady», dedi depýtat.
Sondaı-aq seısmıkalyq qaýipsizdikke baılanysty Tótenshe jaǵdaılar mınıstrligine úılestirýshi organ mártebesin berý máselesi de qaralady. Buǵan qosa salanyń qyzmettik quzyretin birshama keńeıtý qarastyrylady. Jumys toby ókilderiniń málimdeýinshe, azamattyq qorǵanys zańyna keıingi 10 jylda túzetý engizilmegen.Májilis otyrysynda sonymen qatar Qazaqstan men О́zbekstan úkimetteri arasyndaǵy «Ortalyq Azııa» halyqaralyq ónerkásiptik kooperasııa ortalyǵynyń qyzmetin retteý týraly kelisimdi ratıfıkasııalaý jobasy da kún tártibine engizilgen.
«Májilis komıtetteri birqatar jańa zań jobasyn jumysqa qabyldaıdy. Olar: topyraqty qorǵaý jáne jasandy ıntellekt týraly zań jobalary men olarǵa ilespe túzetýler, jer qoınaýy jáne jer qoınaýyn paıdalaný týraly zań jobasy jáne Qazaqstan men О́zbekstan úkimetteri arasyndaǵy Qazaqstan-О́zbekstan memlekettik shekarasynyń rejımi týraly kelisimdi ratıfıkasııalaý jobasy», delingen Májilis habarlamasynda.