Atalǵan kólemdegi sý Qazaqstanǵa 1 qazanǵa deıin kelmek. Bul 2024 jylmen salystyrǵanda 1 mlrd tekshe metrge artyq, dep habarlaıdy Egemen.kz.
Sý resýrstary jáne ırrıgasııa mınıstri Nurjan Nurjigitov pen О́zbekstan Sý sharýashylyǵy mınıstri Shavkat Hamraev ekijaqty sý yntymaqtastyǵyn tereńdetý jónindegi birlesken jumys tobynyń 12-shi otyrysynda osy jóninde kelisimge kelgen.
Vedomstvonyń baspasóz qyzmeti málim etkendeı, taraptar ótken sý sharýashylyǵy maýsymynda (2023 jylǵy qazan – 2024 jylǵy qazan) Qazaqstanǵa 15 mlrd tekshe metr sý jiberilgenin atap ótti. Osylaısha, bıyl bul kólem 1 mlrd tekshe metrge ulǵaıady dep kútilip otyr. Sondaı-aq, ózbek tarapy bıyl sýarý maýsymynda «Dostyq» kanaly arqyly turaqty sý berýdi qamtamasyz etýge kómektesedi.
Budan bólek, mınıstrler memleketaralyq kanaldarda birlesken jóndeý jumystaryn júrgizý týraly ýaǵdalasty. Bul Qazaqstannyń Túrkistan oblysy men О́zbekstannyń Jızaq oblysynyń sharýalaryna sý berý sapasyn jaqsartady.
«Kezdesýde talqylanǵan taǵy bir taqyryp Syrdarııa ózeninde sýdy esepke alýdy avtomattandyrý máselesi boldy. Osyǵan deıin biz esep júıesi ornatylatyn alǵashqy 10 núkteni anyqtadyq. Ár eldiń aýmaǵynda 5 núkteden. Búgin biz jobanyń tehnıkalyq-ekonomıkalyq negizdemesin ázirleý úshin tehnıkalyq tapsyrmany kelistik. Aqpan aıynda ortaq is-qımyldy talqylaý úshin halyqaralyq uıymdardyń ókilderimen birlesken jumys tobynyń kezdesýi ótedi», dedi mınıstr Nurjan Nurjigitov.