Ulttyq qorǵanys ýnıversıtetinde keıingi jyldardaǵy qarýly qaqtyǵys mysalynda áskerlerdi moraldyq-psıhologııalyq qamtamasyz etýdi jetildirý máseleleri jóninde dóńgelek ústel ótti. Jıynǵa Qorǵanys mınıstriniń tárbıe jáne ıdeologııalyq jumys jónindegi orynbasary general-maıor Shaıh-Hasan Jazyqbaev tóraǵalyq etti.
Moraldyq-psıhologııalyq turaqtylyq – áskerlerdiń jaýyngerlik qabiletiniń negizgi quramdas bóligi. Sondyqtan salada zamanaýı ádister men tásilderdi tájirıbege engizý, dáıekti jáne júıeli jumys isteýge erekshe nazar aýdarý mańyzdy. Bir jaǵynan, qazirgi zamanǵy soǵystyń nátıjesi jeke quramnyń tehnıka men qarýdy sheber meńgerý qabiletine ǵana emes, sonymen qatar onyń psıhologııalyq kóńil kúıine, áskerı qyzmetshilerdiń qyzmetine qolaıly jaǵdaı jasaýǵa, olardyń naqty áleýmettik qajettilikterin qanaǵattandyrýǵa baılanysty. Muny eskergen mınıstrdiń orynbasary jıynda bul tek psıhologııalyq testter ne jeke áńgime júrgizýmen shektelmeı, sarbazdardyń kúndelikti jáne oqý-jaýyngerlik sharalary barysynda da júrgizilýi qajet ekenin aıtty.
– Áskerılerdiń jaýyngerlik qabiletin anyqtaıtyn negizgi krıterııdiń biri – olardyń moraldyq jáne psıhologııalyq kúıi. О́ıtkeni áskerı qyzmetshilerdiń shaıqasta qorqynyshty jeńýi jáne jeńiske degen erik-jigerin saqtaýy, tapsyrmanyń sátti oryndalýy qaýip-qaterlerge, shıelenisterge jáne urys jaǵdaılaryna qalaı den qoıýyna baılanysty. Demek sarbazdar men ofıserlerde bul faktorlardyń turaqty bolýy jaýyngerlik is-qımylda qarym-qabiletin kórsetedi, – dedi general-maıor Shaıh-Hasan Jazyqbaev.
Tipti osy sabaq barysynda jaýyngerlik daıarlyq boıynsha tómen baǵa alǵan, úıretkenge nemquraıly qaraıtyn, shynyqpaǵan, álsiz jáne qyzmetke beıimdelýde neshe túrli qıyndyqtarǵa tap bolǵan áskerı qyzmetshilerge erekshe nazar aýdarý qajet degen pikirde. Onyń ústine psıhoemosıonaldyq kúı jeke quramǵa shyǵyndarǵa, jaǵdaılardyń aýyrlyǵyna ne resýrstardyń jetispeýshiligine qaramastan, jaýyngerlik rýh pen kúsh-jigerdi saqtaýǵa múmkindik beredi. Sáıkesinshe bólimsheniń jaýyngerlik tıimdiligin aıtarlyqtaı arttyrady.
Dóńgelek ústelde Qurlyq áskerleri, Áýe qorǵanysy kúshteri jáne Áskerı-teńiz kúshteri bas qolbasshylarynyń orynbasarlary da kózqarasymen bólisti. Olar moraldyq-psıhologııalyq áser etýde psıhologııalyq, aqparattyq-tárbıelik jáne áskerı-áleýmettik jumys syndy komponentterge jeke-jeke toqtaldy.
Basqosýǵa beıindi departament ókilderi, UQÝ jan-jaqty qamtamasyz etý fakýlteti áskerı oqytý jáne tárbıe kafedrasynyń professor-oqytýshylar quramy qatysty. Beınekonferensııa arqyly jeke quramnyń moraldyq-psıhologııalyq turaqtylyǵyn nyǵaıtý máselelerin talqylaýǵa ásker tekteriniń jáne óńirlik qolbasshylyqtardyń laýazymdy adamdary da qosyldy.
Buǵan qosa basqosýǵa Qarýly kúshter Tyl bastyǵy basqarmasynyń jáne áskerı bólimderdiń ókilderi de qatysty. Olar áskerlerdi moraldyq-psıhologııalyq qamtamasyz etýdi nyǵaıtý jónindegi óz usynystaryn ortaǵa saldy.
Jıyn qorytyndysynda taqyryp tóńiregindegi usynystardyń barlyǵy praktıkada iske asyrý úshin muqııat taldanyp jınaqtalatyny aıtyldy.