Joǵary aýdıtorlyq palata orta bilim berý salasyn damytýǵa jáne onyń sapasyn arttyrýǵa bólingen qarajattyń paıdalanylý tıimdiligine aýdıt júrgizdi. Onyń nátıjeleri Álıhan Smaıylovtyń tóraǵalyǵymen ótken Joǵary aýdıtorlyq palatanyń otyrysynda qaraldy, dep habarlaıdy Egemen.kz.
Talqylaýǵa oqý-aǵartý mınıstri Ǵanı Beısembaev, ǵylym jáne joǵary bilim mınıstri Saıasat Nurbek, mınıstrlikterdiń jaýapty laýazymdy tulǵalary, sondaı-aq vedomstvolyq baǵynysty uıymdardyń basshylary qatysty.
«2019 jyldan bergi kezeńdi qamtyǵan aýdıtorlyq is-sharanyń qorytyndysyna sáıkes, Qazaqstanda mektepter sany turaqty ósip keledi. 2023-2024 oqý jylynda olardyń sany 7,8 myńnan asqan. Oqýshylar men oqytýshylar sany da artyp keledi. Bul eldegi bilim berýdiń qoljetimdiligin kórsetedi. Orta bilim berý júıesin qarjylandyrý da turaqty ósip otyr. Bul salaǵa jumsalǵan shyǵystar 2019 jylǵy 1,3 trln teńgeden 2024 jyly 4,8 trln teńgege deıin, ıaǵnı 3 ese artqan. Bul memleket úshin osy salanyń basymdyǵyn rastaıdy», delingen habarlamada.
Alaıda júrgizilgen memlekettik aýdıt orta bilim berýdi damytý boıynsha qabyldanyp jatqan sharalardyń tıimdiligin tómendetetin birqatar problemalyq máseleler men júıeli kemshilikterdi anyqtaǵan.
«Oqý-aǵartý mınıstrligi birinshi kezekte qabyldanatyn qujattar reformalardyń dáıektiligin qamtamasyz etýge tıis ekenin qadaǵalaýy kerek. Sońǵy jyldary orta bilim berýdi qarjylandyrý 3 eseden astam ósken. Mundaı jaǵdaıda memleket qabyldanyp jatqan sharalardan úlken nátıje kútetini anyq», dedi Álıhan Smaıylov.
Aýdıtorlyq qorytyndyǵa sáıkes, pedagogterdi daıarlaýǵa arnalǵan memlekettik tapsyrysty qalyptastyrý kezinde Eńbek mınıstrliginiń boljamdary men bilim berý júıesiniń naqty qajettilikteri arasynda aıtarlyqtaı sáıkessizdikter anyqtalǵan.
«Bilim berý standarttary salasyndaǵy reformalar júıeli júrgizilmeıdi. Oqý josparlaryndaǵy jıi ózgerister shyǵarylyp qoıǵan oqýlyqtardy qaıta qaraýǵa jáne bıýdjettiń tıimsiz shyǵystaryna ákeledi. Sońǵy 5 jylda oqýlyqtardy qaıta qaraý saldarynan ekonomıkalyq shyǵyndar 16 mlrd teńgeden asqan. Oqýlyqtardyń sapasyn saraptaý men baqylaýda kemshilikter anyqtaldy. 5 jyl ishinde baǵalaý ólshemsharttary 12 ret ózgergen, bul ornyqty baǵalaý júıesiniń joq ekenin kórsetedi. Memlekettik kórsetiletin qyzmetterdi baqylaý aqparattyq júıesi arqyly saraptama tártibi iske asyrylmaǵan, rásimder qaǵaz júzinde júrgiziledi. Lısenzııalaý – sapaly bilim alýdaǵy memlekettik kepildiginiń biri. Alaıda elde memlekettik mektepterdi qosa alǵanda, 66 mektep lısenzııasyz jumys isteıdi. Attestattaýdan sátti ótý paıyzy tómen, bul bilim berý mekemelerinde taralǵan júıeli problemalardy dáleldeıdi. Mektepterdiń tek 18,2%-y attestattaýdan bir degennen óte alady», delingen habarlamada.
Jalpy memlekettik aýdıt barysynda 1,1 mlrd teńge soma kóleminde qarjylaı zań buzý, 62,4 mlrd teńgege qarajat pen resýrstardy tıimsiz josparlaý jáne 3,2 mlrd teńgeniń tıimsiz paıdalanǵanyn anyqtalǵan.