Keıingi kezdegi keremet jańalyqtyń biri – zańǵar jazýshy Muhtar Áýezovtiń ómiri men shyǵarmashylyǵy týraly sonaý Batys elderinde derekti fılmniń jaryq kórýi bolmaq.
Atap aıtsaq, Fransııa men Germanııa arasyndaǵy mádenı jáne aqparattyq yntymaqtastyqtyń nátıjesinde 1990 jyly qurylǵan «Arte france» atty eýropalyq qoǵamdyq telearnada aqpan aıynan bastap uly jazýshy Muhtar Omarhanuly Áýezov týraly arnaıy derekti fılm kórsetilip jatyr. Atalǵan jobanyń avtory – belgili jýrnalıst Anna Lýssýarn. Fılm avtorlary 2023 jyly arnaıy saparmen elimizge kelip, jazýshynyń týǵan mekeni Abaı aýdanyna at basyn buryp, qalamgerdiń kindik qany tamǵan jerimen tanysqan. Sonymen birge Almaty qalasyndaǵy «Áýezov úıi» ǵylymı-mádenı ortalyǵyn túsirip, materıaldar jınaǵan. Sol sapary ortalyq dırektory Dıar Asqaruly Qonaevtan Muhtar Áýezov týraly suhbat ta jazyp alǵan.
Atalǵan qysqa derekti fılmdi ǵalamtordan taýyp kórdik. Túsirý toby aty alysqa jetken qalamger shyǵarmashylyǵynyń keńge qanat jaıǵany – «Abaı joly» roman-epopeıasynan bastaý alatynyn nyqtap aıtady. Keń jaılaý, aýyl ómiri, salt pen dástúr, ulttyq stıldegi án men kúı – bári-bári osy fılmde kórinis tabady. Bul fılm atalǵan telearnada bir aı boıy turaqty túrde kórsetiledi eken.