Jaqynda ǵana shymyldyǵy túrilgen «018-avtobýs» dep atalatyn psıhologııalyq dramaǵa mártebeli kórermen «Sáken teatrynyń repertýaryna engen ózgeshe týyndy» dep baǵa berdi. Soǵan qaraǵanda Qazybek Amanjol esimdi jas dramatýrg qundylyqtyń quldyraǵanyn, qoǵamnyń dertin toptap kelip bir avtobýstyń ishine syıdyra alǵandaı...
Dramatýrgtiń oıyndaǵysyn sahnaǵa sátti alyp shyqqan shyǵarma rejısseri Bıbiajar Dıhannyń kásibıligi de ról oınaǵandaı. Mundaı bıik dárejede kórkemdeı alǵanyna dramatýrgtiń ózi de qaıran.
«Sáken teatrynyń akterleri psıhologııalyq dramanyń bolmysyn, moralin sezinip oınady. Tipti akterlik sheberlikteri arqyly keıipkerlerdi shynaıy etip kórsetti. Dıalogter óte sátti shyqty. Rejısserge de alǵysym sheksiz. «Men osyndaı dúnıeni jazyppyn-aý», dep tańǵalǵanymdy nesine jasyramyn?» deıdi Qazybek Amanjol.
Psıhologııalyq dramadaǵy Marınanyń rólin Saıa Bekbosynova, Alınany Aıǵanym Aıtbaeva, stýdentti Nurtilek Asylbek, kempirdi Gúlnar Bazarbaeva, moldany Rahat Qoshjanov, úshinshi áıeldi Saıagúl Táshimbekova, ekinshi erkekti Talǵat Sadyqov, ekinshi áıeldi Arýjan Kalenova, birinshi erkekti Amangeldi Muqashev, birinshi áıeldi Nurbıbi Muqan, kásipkerdi Baýyrjan Nurmaǵanbetov, saýdagerdi Jandos Sháken, Zakırdi Ahaı Jumamuratov sátti somdap shyqqan.
Jol. Jolaýshy... Jer betindegi tirshilik ıesiniń barlyǵy da – ómir saparynda júrgen jolaýshy. Ol sapar birde órge bastaıdy, endi birde tómenge quldılaıdy.
О́zindik planeta ispetti «018-avtobýsta» taǵdyrlary toǵysqan ár keıipkerdiń óz aqıqaty bar. Adamdyq pen nadandyq, kesirlik pen kesapattyq, adaldyq pen aramdyq arpalysqa túsetin buralań jolda apattan aman qalǵanynyń da, arýaqqa aınalǵanynyń da kórermenge aıtary, salar oıy negizdi.
Sóıtip, shyǵarmashylyq ujym «018-avtobýsta» tabysqan túrli taǵdyrdan psıhologııalyq portretter galereıasyn jasapty. Avtobýs ishindegi álem arqyly búgingi qoǵam kelbetin bederlegen.
Avtobýsta molda, kásipker, áıel, órekpigen jigit otyrady. Arasynda júkti áıel de bar. Áńgime avtobýstaǵylar júkti áıelderdiń qoǵamdyq kólikte qatynaýyna narazylyq bildirýinen bastalady. Kıkiljiń sodan órbıdi. Molda bolsa ýaǵyzyn aıtyp, kásipker bolsa baılyǵyn aıtyp masattanady. Al áıel jaraly jan syryn aqtarady. О́zin aqtaý úshin qorshaǵan ortasyn, qoǵamdy kinálaıdy. Is nasyrǵa shapqan soń, qoǵamdyq kóliktegi jas dáriger júkti áıeldi basqa kólikke otyrǵyzyp jiberedi. Dramanyń sońynda 018-avtobýs jol apatyna túsip, jolaýshylardyń barlyǵy til tartpaı ketedi. Osylaısha, avtor úlken ómirge shyr etip keletin kirshiksiz náresteni kirlegen qoǵamnan arashalap, aman saqtap qalady.
Iá, psıhologııalyq drama birneshe býynnyń sanasy dertke ushyraǵanyn jetkizgendeı. Túıininde jas urpaqty qoǵam dertine uryndyrmaı saqtap qalǵany kórermen sanasyna sáýle quıǵandaı áser berdi.
Qaraǵandy oblysy