«Taldau Talks» podkasynyń salyq reformasyna arnalǵan jańa shyǵarylymy jarııalandy. Salyq kodeksiniń jobasyna engiziletin túzetýler Parlament depýtattarynyń qaraýyna usynylýyna baılanysty osy taqyrypty talqylaý mańyzdy bolyp otyr.
Parlament Senatynyń tóraǵasy Máýlen Áshimbaev, Premer-mınıstrdiń orynbasary – Ulttyq ekonomıka mınıstri Serik Jumanǵarın, «Atameken» UKP tóralqasynyń tóraǵasy Raıymbek Batalov, sondaı-aq belgili ekonomıst Almas Chýkın úsh saǵattyq ashyq áńgime barysynda salyq reformasynyń alǵysharttary jáne onyń negizgi baǵyttaryn, elimizdegi bıznes pen jalpy ekonomıkalyq jaǵdaıǵa áserin egjeı-tegjeıli taldady.
Podkasta kóterilgen máselelerdiń qatarynda QQS mólsherlemesin ózgertý, bızneske salyq jeńildikteri, memlekettik shyǵyndardy ońtaılandyrý, salyq saıasatynyń ınflıasııaǵa áseri, sondaı-aq ótemaqy men ataýly áleýmettik kómek tetikteri bar. Senat tóraǵasy atap ótkendeı, salyq reformasy – elimizdiń uzaqmerzimdi damýyna baǵyttalǵan strategııalyq mańyzdy bastama.
«Prezıdent Qasym-Jomart Toqaev ońtaıly jáne teńgerimdi salyq júıesin qurý mindetin júktedi. Sondyqtan bárimiz osy mańyzdy, qajetti jáne tıimdi qujatty qabyldaýǵa birlesip jumys isteýimiz kerek. Salyq reformasy elimizdiń uzaq merzimdi, sapaly jáne turaqty damýyna, sondaı-aq barlyq áleýmettik mindettemelerdi oryndaýǵa baǵyttalǵan», dep atap ótti M.Áshimbaev.