Memleket basshysynyń tapsyrmasy boıynsha Premer-mınıstrdiń orynbasary Qanat Bozymbaevtyń tóraǵalyǵymen ótken Úkimettik komıssııada «Qazaqmys korporasııasy» JShS «Jomart» kenishindegi apatty tergeýdiń aldyn ala qorytyndylary qaraldy, dep jazady Egemen.kz.
Úkimettiń málimetinshe, tergeý aıasynda 8 kishi komıssııa qurylyp, ǵylymı-zertteý ınstıtýttary men zerthanalarynyń sarapshylary men mamandary da tartylǵan.
Komıssııa otyrysynda tergeý barysy týraly Tótenshe jaǵdaılar, Ishki ister, Eńbek jáne halyqty áleýmettik qorǵaý mınıstrligi ókilderiniń baıandamalary tyńdaldy. Atap aıtqanda, komıssııalar men kishi komıssııalardyń músheleri oqıǵany kózimen kórgen kýágerler arasynda saýalnama júrgizgen, óndiris tehnologııasyn zerttep, tehnıkalyq qurylǵylar men jabdyqtardyń jumysqa jaramdylyǵyn tekserip, tıisti saraptamalar júrgizilgen.
Komıssııa apattyń negizgi sebebi retinde taý-ken qazbasynan metannyń jınalýy men bólinýi, sodan keıin elektr jabdyqtarynyń ushqynynan jarylys bolýyn atady. Sondaı-aq ónerkásiptik qaýipsizdik pen eńbekti qorǵaý boıynsha aıtarlyqtaı ereje buzýshylyqtar anyqtalyp, jaýapty tulǵalar toby anyqtalǵan.
Jıynda Ulytaý oblysynyń ákimi Dastan Ryspekov pen «Qazaqmys korporasııasy» JShS basqarma tóraǵasy Nurahmet Nurıev apatta qaza tapqandardyń otbasylaryna áleýmettik qoldaý men kómek kórsetý jáne ótemaqy tóleý boıynsha atqarylyp jatqan sharalar týraly baıandady.
Qazirgi ýaqytta «Jomart» kenishiniń jumysy toqtatylǵan. Komıssııa qaýipti óndiristik obektilerde osyndaı oqıǵalardyń aldyn alý sharalaryn ázirlegen.
Keńes qorytyndysy boıynsha komıssııa tóraǵasy Qanat Bozymbaev «Qazaqmys korporasııasy» JShS-ǵa buzýshylyqtardy joıý men apattardyń aldyn alý boıynsha, onyń ishinde kenishtegi qaýipsizdikti arttyrý, aýadaǵy gaz quramyn anyqtaýdyń avtomattandyrylǵan júıelerin engizý, beınebaqylaý ornatý jáne basqa da birqatar tapsyrma berdi.
Tergeý jumystary jalǵasyp jatyr. Úkimet tergeýdi udaıy baqylaýda ustaıtynyn málimdedi.