Keıingi kezderi elimizdiń ádebı tynys-tirshiliginde aıtarlyqtaı jańalyqtar bar. Sonyń biri – Memlekettik syılyqtyń laýreaty, aqyn Ulyqbek Esdáýlettiń ómirbaıany men sýreti «Gonkong ádebıeti men óneri» jýrnalynyń muqabasyna basylypty. Atalǵan alpaýyt basylym 2025 jyldyń birinshi sanyn Ulyqbek Esdáýlettiń shyǵarmashylyǵyn nasıhattaýmen bastaǵany – ádebıetimiz úshin úlken jańalyq.
Qazaq poezııasynan oıyp oryn alǵan aqynnyń sonaý alystaǵy, Gonkongtaǵy ádebı basylymda esimi atalyp jatqany ult ádebıetiniń keregesi keńge jaıyla bastaǵanynyń belgisi-dúr. Jýrnal muqabasynda «Ulyqbek Esdáýlet – qazaq aqyny, jazýshysy jáne aýdarmashysy. Memlekettik syılyqtyń laýreaty. Onyń shyǵarmashylyǵy fılosofııalyq jáne áleýmettik máselelerdi qamtıtyn keń aýqymdy taqyryptardy qozǵaıdy. Shyǵarmalary kóptegen tilge aýdarylǵan» degen túsinikteme berilgen.
U.Esdáýlettiń aıtýynsha, aqynnyń óleńderin aýdarý boıynsha byltyr «Gonkong ádebıeti men óneri» jýrnalynyń redaksııa alqasyna 20 jylǵa múshelikke qabyldaý týraly usynys hat kelip, kelisim jasalypty. О́tken jyl basynda alystaǵy ádebı basylym onyń óleńderin aýdaryp, oqyrmanǵa usynǵan.