Buǵan deıin aqyn, «Daryn» memlekettik jastar syılyǵynyń laýreaty Aqberen Elgezektiń «Bolmaǵan balalyq shaq» povesi kitap bolyp qoldan-qolǵa ótkeni belgili. Keıin spektakl retinde qoıylǵany óz aldyna, qazir kórkem fılm elimizdiń kınoteatrlaryn kezip júr jáne kórermen jaqsy qabyldap jatqanyn aıta ketken jón.
Astanada avtordyń «Bolmaǵan balalyq shaq» povesiniń jelisi boıynsha túsirilgen fılmniń jabyq kórsetilimine qoǵam qaıratkerleri men depýtattar, zııaly qaýym ókilderi qatysty. Kınotýyndy aqyn, jazýshy Aqberen Elgezektiń óz ómir jolyna negizdelgen. Iаǵnı fılmdegi bas keıipker Aqosh – avtordyń prototıpi. Týyndynyń rejısseri Aıdyn Sahaman esimi kórermenge osyǵan deıin «Dos-Muqasan» fılmi arqyly jaqsy tanys.
«Avtobıografııasy joq adamnan aqyn da, jazýshy da shyqpaıdy. Sondyqtan «Bolmaǵan balalyq shaqty» keremet týyndy dep aıta alamyn» dedi fılm premerasyna qatysqan jazýshy-dramatýrg Roza Muqanova.
Fılmdi tamashalap, kóz jasyn tyıa almaı jylap shyqqan kórermender de bar. Al basty róldi oınaǵan Almasbek Shákárim nebári 11 jasta ǵana eken. Aqynnyń balalyq keıpine engen onyń bul – debıýttik obrazy. Jas ta bolsa kúrdeli róldi beınelep, kórmegen balanyń sezim arpalystaryn jetkizýde oǵan ákesi, akter Maqsat Rahmet kómektesipti. Shytyrmanǵa toly bestsellerdi ózi de oqyp, tushynǵanyn aıtady.
– Áýeli shyǵarmany oqyp, oı eleginen ótkizdim. Sodan keıin ony zerttep, óz rólimdi taldadym, – deıdi jas talap.
Fılm balalyǵy aýyrtpashylyq pen taqsiretke túsken Aqoshtyń taǵdyr-talaıyn sýretteıdi.
– Kınonyń basty qazynasy jas akterdiń jaqsy tańdalǵany dep bilemin. Úlken akterler sheberlikke salyp, óz rólin oıdaǵydaı alyp shyǵa alady. Al jas akterdi tabý ońaı emes, – deıdi avtor, aqyn-jazýshy Aqberen Elgezek.