Ulttyq quryltaıda Torǵaı eline qatysty birdeńe aıtylyp qala ma dep eleńdep otyrǵanda Prezıdent Qasym-Jomart Toqaevtyń: «Osy tusta taǵy bir mańyzdy ınfraqurylymdyq joba qolǵa alynatyny týraly jarııalaǵym keledi. Men úkimetke Astanadan Arqalyq, Torǵaı jáne Yrǵyz arqyly Transkaspıı halyqaralyq kólik dálizine týra shyǵatyn avtokólik jolynyń qurylysyn bastaýdy tapsyrdym. Jańa kúre jol ortalyq jáne batys aımaqtar arasyn 560 shaqyrymǵa qysqartady. Bul tutas Torǵaı óńiriniń damýyna serpin beretin aýqymdy joba» degenin estip rıza bolyp qaldyq.
Torǵaıdyń erteńine alańdap otyrǵan jandardyń qýanyshynda shek bolǵan joq. Áleýmettik jeli de jaǵymdy jańalyq áp-sátte tarap ketti. Sonymen qatar odan ári Arqalyq qalasynda áýejaıdy qalpyna keltirý men jańa aerovokzal salý týraly bastamany da el erekshe qabyldady.
Sonaý 90-jyldardyń sońynda jabylyp qalyp, keıin basqa oblystar ashylǵanda ártúrli sebeppen Torǵaı oblysy ashylmaı qalǵanda jeldiń ótinde, úmittiń jeteginde júrgen el azamattary ǵana emes, jalpy halyq Prezıdentke úmitpen qarap, birneshe ret hat jazyp edi.
Endi halyq bıylǵy Alash qaıratkeri M.Dýlatulynyń 140 jyldyǵy qarsańynda bir jańalyq bolyp qala ma dep otyrǵanda, Memleket basshysynyń búgingi aýzynan aıtylǵan jańalyqty el qýana qabyldap qana qoımaı, bul keleshekte Torǵaı oblysy ashylýynyń alǵashqy irgetasynyń qalanýy ma degen úmitte otyr.
Jalpy, elimizdiń ishki óńirleriniń damý múmkindigin, áleýetin aıqyndap arnaıy baǵdarlamalar qabyldasa, túbegeıli ózgerister jasalýyna múmkindik týar edi. Torǵaı óńiri Qazaqstanda aýyl sharýashylyǵyn damytýda sapaly astyǵy men mal ósirý, et daıyndaý haby bolýǵa tolyq múmkindigi bar. Jańa jumys oryndary ashylsa, óńirge halyq turaqtap, kóshi-qon báseńdeıdi.
Sonymen qatar el irgesine kelip turǵan kógildir otynnyń Torǵaıǵa tartylýy da elge úlken demeý, jańa ekonomıkalyq salalar men baǵyttardyń qalyptasýyna múmkindik beredi.
Qurmanǵalı DARKENOV,
L.N.Gýmılev atyndaǵy Eýrazııa ulttyq ýnıversıtetiniń professory