«Qazaqstan-Qytaı» yntymaqtastyq komıtetiniń 12-shi otyrysy aıasynda Qazaqstannyń Qarjy vıse-mınıstri Dáýren Keńbeıl Qytaı Halyq bankiniń, Qytaı Eksımbankiniń jáne Azııa ınfraqurylymdyq ınvestısııalar bankiniń (AIIB) ókilderimen ekijaqty kezdesýler ótkizdi, dep habarlaıdy Egemen.kz.
Qytaıdyń Halyq Banki Tóraǵasynyń orynbasary Lý Leı myrzamen kezdesý barysynda halyqaralyq qarjy naryqtaryndaǵy aǵymdaǵy ahýal, ekijaqty qarjylyq yntymaqtastyqty damytý týraly pikir almasty jáne Qytaı naryǵynda panda-bondtardy shyǵarý boıynsha ózara is-qımyl týraly ýaǵdalasty.
Qytaı Eksımbankiniń vıse-prezıdenti Van Kan myrzamen Qazaqstandaǵy ınvestısııalyq jobalardy qarjylandyrý men iske asyrýdy, onyń ishinde Q.I. Sátbaev atyndaǵy kanaldan Astana qalasyna deıin № 4 sorǵy-súzgi stansııasymen sý qubyryn, Almaty qalasyndaǵy metronyń jańa jelilerin salýdy, sondaı-aq ótkizý pýnktteriniń kedendik ınfraqurylymyn jańǵyrtýdy talqylady.
Budan basqa, ekonomıkalyq yntymaqtastyqty damytý, Áriptestik týraly negizdemelik kelisimge qol qoıý jáne bıýdjettik qoldaý boıynsha jańa baǵdarlamany daıyndaý máseleleri AIIB
Bas ınvestısııalyq dırektory Konstantın Lımıtovskıımen kezdesýde qaraldy.
Kezdesýler qorytyndysy boıynsha Taraptar birlesken jobalardy iske asyrýǵa, áriptestikti odan ári damytýǵa jáne ózara tıimdi maqsattarǵa qol jetkizýge senim bildirdi.