Almatyda «Taza Qazaqstan» respýblıkalyq baǵdarlamasy men «Almaty – bizdiń ortaq úıimiz» qalalyq naýqany aıasynda «Almaty clean & green» atty aýqymdy tazalyq jáne kógaldandyrý aksııasy ótti, dep habarlaıdy Egemen.kz.
Is-sharanyń basty maqsaty – qala ekologııasyn jaqsartý jáne kógaldandyrý jumystaryn júrgizý.
«Almaty clean & green» aksııasy qala turǵyndaryn biriktirip, olar kóshelerdi, qoǵamdyq oryndardy, saıabaqtardy, skverlerdi jáne ózen jaǵalaýlaryn tazalaý jumystaryn belsene atqardy. Sonymen qatar, senbilik barysynda aǵashtar men butalar otyrǵyzyldy. Aksııaǵa Almaty qalasynyń ákimi Erbolat Dosaev, máslıhat depýtattary, mádenıet qaıratkerleri, sportshylar, jastar men qoǵamdyq uıym ókilderi, ekobelsendiler jáne qala turǵyndary qatysty.
Tazarý kúninde ótken ekologııalyq aksııaǵa 50 myńnan astam turǵyn, 1 200-ge jýyq kommýnaldyq qyzmetkerler atsalysyp, 350-den astam arnaıy tehnıka jumyldyryldy. Aýqymdy tazalyq jumystary barysynda saıabaqtar, gúlzarlar, aýlalar jáne demalys oryndary tazartylyp, 8 myń tekshe metrden astam qoqys jınalyp, qala ákimdigi tarapynan arnaıy polıgonǵa shyǵaryldy.
«Almaty clean & green» aksııasynyń mańyzdy nátıjesi dep alma, almurt, shegirshin, qaraǵan, úıeńki jáne shaǵan syndy 10 myńnan astam aǵash otyrǵyzýdy aıtýǵa bolady. Aksııa ótken oryndarda mádenı-oıyn-saýyq baǵdarlamasy uıymdastyryldy.
Ekoaksııaǵa qatysqan qala turǵyndary men estrada juldyzdary oıyn bólisip, almatylyqtardy týǵan qalasyna qamqorlyq kórsetýge shaqyrdy.
Ekologııalyq bastamalarymen tanymal almatylyq Evgenıı Muhamedjanov ekologııalyq mádenıettiń mańyzdylyǵyn atap ótti.
«Ekologııalyq mádenıetti qalyptastyrý – qalamyzdy túrlendirýdiń negizgi qadamy. Bul Almatynyń ınvestısııalyq tartymdylyǵyn, týrıstik áleýetin jáne jalpy ómir sapasyn arttyrady. Biz týǵan qalamyz úshin qoldan kelgenniń bárin jasaýǵa daıynbyz», dedi ekolog.
Qoǵam qaıratkeri, QHA múshesi Rýstam Kaıryev mundaı sharalardyń óskeleń urpaqty tárbıeleýdegi mańyzdylyǵyna toqtaldy.
«Biz tek qoqys jınap qoımaı, ekologııalyq sanasy joǵary qoǵam qalyptastyrýdyń negizin qalap jatyrmyz. Búgin osyndaı ıgi iske úles qosqanyma qýanyshtymyn. Biz birge súıikti qalamyzdy taza ári jaıly ete alamyz, óıtkeni Almaty – bizdiń ortaq úıimiz!», dedi ol.
Qazaqstannyń eńbek sińirgen qaıratkeri Aıgúl Qosanova osyndaı bastamalardyń mańyzyn atady.
«Árıne, bul aýqymdy ári mańyzdy jumys, óıtkeni súıikti qalamyzdyń tazalyǵy bizge, onyń turǵyndaryna baılanysty. Sol sebepti turaqty túrde osyndaı is-sharalarǵa qatysyp turamyz. О́ıtkeni bárimiz osynda ómir súrip jatyrmyz, al qalamyzdyń tazalyǵy – árbirimiz úshin mańyzdy. Úıde otyrmaı, kireberisti, aýlany, kósheńizdi tazalańyz!», dep ol turǵyndarǵa úndeý jasady.
Alataý aýdanynda ótken ekologııalyq aksııaǵa qatysqan ánshi О́ktem Altaev mundaı is-sharalardyń sergitip, kóterińki kóńil-kúı syılaıtynyn aıtty.
«Men Almatynyń tazalyǵyna úles qosý úshin qatysyp otyrmyn. Munda naǵyz merekelik atmosfera ornaǵan. Naýryz meıramy men qasıetti Ramazan aıynyń osy is-sharamen tuspa-tus kelýi erekshe áser syılap tur. Aksııa joǵary deńgeıde ótýde. Almatyny jaqsy kóreıik, onyń tazalyǵyn saqtaıyq – bizdiń súıikti qalamyz árdaıym júregimizde!», dedi ónerpaz.
Qazaqstannyń eńbek sińirgen qaıratkeri, estrada jáne opera ánshisi Tolqyn Zabırova almatylyqtardy merekemen quttyqtap, aksııaǵa belsene qatysty.
Qoǵam qaıratkeri Beknur Qısyqov mundaı is-sharalardyń azamattyq belsendilikti nyǵaıtatynyn atap ótti.
«Biz osy is-shara arqyly qalaǵa qamqorlyq jasaý mádenıetin qalyptastyramyz. Almaty Clean & Green – jaı ǵana ekologııalyq bastama emes, bul – janashyr adamdardy biriktiretin qozǵalys», dedi ol.
Qazaqstannyń eńbek sińirgen qaıratkeri Sulýshash Nurmaǵambetova senbiliktiń tárbıelik mánine toqtaldy.
«Jastardy osyndaı is-sharalarǵa tartý óte mańyzdy. Bul tek tazalyq jumystary emes, azamattyq jaýapkershilik pen týǵan jerge degen súıispenshiliktiń mektebi. Men Almatyda 50 jylǵa jýyq ýaqyt turamyn, qalamyzdyń árdaıym taza bolǵanyn qalaımyn!», dedi ol.
Teatr jáne kıno aktrısasy Móldir Serikbaı shyǵarmashylyq adamdarynyń mundaı aksııalarǵa qatysýynyń mańyzdylyǵyn jetkizdi.
«Biz óner adamdary sahnada mańyzdy máselelerdi jıi kóteremiz. Biraq búgin men ony is júzinde kórsetýdi jón kórdim. Qalaǵa degen mahabbat oǵan qamqorlyq jasaýdan bastalady», dedi ol.