Búgin ońtústik astanada Sıfrlyq damý, ınnovasııalar jáne aeroǵarysh ónerkásibi mınıstrligi jáne Almaty qalasy ákimdiginiń uıymdastyrýymen jasandy ıntellekt salasynda AlmatyFair.ai kórmesi ashyldy, dep jazady Egemen.kz.
Kórmede AI salasyndaǵy álemniń jetekshi IT-kompanııalary, startaptar men sarapshylar bir alańǵa jınalyp, ǵalamdyq syn-qaterler kezeńinde jasandy ıntelektiń múmkindikterin talqylap, aldyńǵy qatarly tehnologııalarmen bólisetin bolady.
Kórmeniń bas demeýshisi – Kaspi.kz, al resmı seriktesteri – Freedom Bank, Halyk Bank.
Kórmede elimizdiń AI salasyndaǵy negizgi bastamalar usynylyp otyr. Olardyń qatarynda halyqaralyq alem.ai jasandy ıntellekt ortalyǵynyń tujyrymdamasy, KazLLM ulttyq tildik modelin damytý, 8 myńnan astam qoldanýshy tirkelgen ulttyq AI platformasy men Tomorrow School - alǵashqy jasandy ıntellekt mektebi bar.
О́ńirlik startap-ekojúıelerdi qoldaý maqsatynda Astana Hub pen IT Park Uzbekistan bastamasymen qurylǵan Ortalyq Azııanyń iri tehnoparkteri alıansy – Central Asian Innovation Hubs qyzmetimen de kórme barysynda tanysýǵa bolady.
Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev kórmeniń ashylý saltanatynda jasandy ıntellekt búginde ekonomıkany, memlekettik basqarý júıesin, bilim berý men densaýlyq saqtaý salalaryn túbegeıli ózgertip jatqandyǵyn atap ótti. «McKinsey zertteýlerine sáıkes, 2030 jylǵa qaraı AI-diń jahandyq ekonomıkaǵa qosar úlesi 20 trln dollarǵa jetýi múmkin. Qazaqstan bul úderiste daıyn sheshimderdi paıdalanyp qana qoımaı, óz tehnologııalaryn damytýy qajet. Bıyl Ulttyq AI platformasyn iske qostyq, óńirdegi alǵashqy ulttyq tildik model — KazLLM-dy qurdyq jáne jasandy ıntellekt týraly zań qabyldaý jumystaryna kiristik. Sondaı-aq Memleket basshysynyń tapsyrmasyna sáıkes, Qazaqstandy AI-ge negizdelgen memleketke aınaldyrýdy kózdeıtin halyqaralyq alem.ai ortalyǵy qurylyp jatyr» dedi mınıstr.
Kórme jasandy ıntellekt tehnologııalarynyń ekonomıka salalarymen qatar densaýlyq saqtaý, bilim berý jáne qalalyq ınfraqurylymǵa da qanshalyqty áseri bar ekenin kórsetedi. Munymen qosa kompanııalar jasandy ıntellektke qatysty ınnovasııalyq jobalary men zamanaýı sheshimderin usynady. Tájirıbe almasý, kásibı baılanystar ornatý men áleýetti ınvestorlarmen kezdesýge biregeı múmkindik beretin AlmatyFair.ai kórmesinde AI komandalar jobalaryn tanystyryp, 10 000 AQSh dollary kólemindegi júlde qory men Kremnıı alqabynda ótetin Hero Training Program akseleratoryna qatysý úshin tartysqa túsedi.
Kórmede sondaı-aq Sıfrlyq damý, ınnovasııalar jáne aeroǵarysh ónerkásibi mınıstrligi IT-ındýstrııanyń eksporttyq áleýetin arttyrý jáne transshekaralyq tehnologııalar transferin ilgeriletýge baǵyttalǵan birqatar mańyzdy kelisimderge qol qoıady. Onyń barysynda Astana Hub pen Y. Altynsarın atyndaǵy Ulttyq bilim akademııasy arasynda Qazaqstannyń bilim berý júıesin sıfrlyq transformasııalaý, ınnovasııalyq tehnologııalardy engizý jáne STEM baǵyttaryn damytý boıynsha memorandýmǵa qol qoıylady.