Búgin, 30 naýryzda kúlli musylman qaýym Oraza aıt meıramyn toılaıdy, dep habarlaıdy Egemen.kz.
Otyz kún oraza tutqan adamdar bul kúni aıt namazy oqylǵannan keıin bir-biriniń úıine aıtshylap, aq dastarhannan dám tatyp, merekeleıdi.
Sharıǵatta qasıetti Ramazan aıy aıaqtalǵannan keıin týatyn sháýýal aıynyń birinshi kúni – oraza aıt merekesi. Negizi oraza aıtty musylmandar bir kún ǵana atap ótken, alaıda el ishinde ony úsh kún qatarynan toılaý dástúri ejelden qalyptasqan. Oraza aıtta ne isteý kerek? Qandaı amaldar atqarǵan abzal?
Eń aldymen saýaby mol istiń biri – pitir sadaqasyn berý. Negizi, ol Raman aıynyń birinshi kúninen bastap aıt namazyna deıingi aralyqta berilýi qajet. Eger kimde-kim pitirdi bermegen bolsa aıt namazy oqylǵanǵa deıin úlgergeni abzal, odan keıin berilse ol tek jaı sadaqa bolyp esepteledi. Namaz bitken soń musylmandar bir-birimen tós qaǵysyp, aıt merekesimen quttyqtaıdy, jaqsy tilekterin aıtady.
Sonymen qatar ıslam ǵulamalary bul kúni Allaǵa sansyz madaq aıtyp, aıt namazyn oqýdyń artyqshylyqtary týraly aıtady. Jaratqanǵa tákbir aıtý dinde zańdastyrylǵan amaldardyń qatarynan sanalsa, aıt namazyn oqý –ýájip.
Abzal amaldardyń taǵy biri – namazǵa shyǵar aldynda qurma jep shyǵý. Bul –súnnet amal jáne otyz kún orazanyń aıaqtalyp, aıt merekesiniń bastalǵanyn bildiredi.
Aıt kúni meıram bolǵandyqtan musylman balasy úıden shyǵar kezde ústine jańa nemese taza kıimin kıip, átirlenip, ǵusyl quıynǵany jón desedi.
Bir-birimen arqa-jarqa bolyp qaýyshyp, syılyq úlestirip, qaıyrymdy is atqarý, muqtaj jandarǵa kómektesý de aıt merekesiniń saýaby mol buzylmaı kele jatqan dástúri. Úı-úıdi aralap aıtshylap, aq dastarhannan dám tatý da júlgesi úzilmegen júıeli amaldardyń biri. Bul kúni aýyz bekitýge bolmaıdy. Qaza bolǵan kúnderdiń orazasy aıttan keıin óteledi.
Mine, oraza aıt meıramynda musylman qaýymy osyndaı amal-qulshylyqtar istep, bir jaǵynan Jaratqanǵa ǵıbadat jasasa, ekinshi jaǵynan ózara syılastyq pen jaqsy qarym-qatynasty nyǵaıtýǵa áreket etedi. Oraza aıttyń ereksheligi de osynda jatyr.