Búgin Májilis ınnovasııalyq qyzmet salasyn memlekettik qoldaý júıesin jetildirý máseleleri boıynsha túzetýlerdi birinshi oqylymda maquldady, dep jazady Egemen.kz.
Zań jobasy biryńǵaı ınnovasııalyq klaster qurý jáne oǵan qatysýshylardy qarqyndy qoldaý arqyly ınnovasııalyq qyzmet jaǵdaıyn jaqsartý úshin ázirlengen.«Innovasııalyq tehnologııalar parki» (Tech Garden) klasterlik qory men «Astana Hab» halyqaralyq tehnoparkin biriktiriledi. Bul rette olardyń qatysýshylary úshin biryńǵaı quqyqtyq baza men ortaq preferensııalar jasalady.
«Búginde jer qoınaýyn paıdalanýshylar óndiristik shyǵyndarynyń 1 paıyzyn «Innovasııalyq tehnologııalar parki» ınnovasııalyq klasterine qatysýshylardyń jobalaryna baǵyttaýǵa quqyly. Tehnoparkterdi biriktirgennen keıin «Astana Hab» qatysýshylary da jer qoınaýyn paıdalanýshylarǵa óz sheshimderin usyna alady jáne irikteý nátıjeleri boıynsha olardan qarjy ala alady. Bul rette «Astana Habtyń» jeńildetilgen salyq rejımi men jedeldetý baǵdarlamalary «Innovasııalyq tehnologııalar parki» ınnovasııalyq klasteriniń basqa qatysýshylaryna da taralatyn bolady», delingen Májilis habarlamasynda.
Búgingi tańda 1,5 myńnan astam IT-kompanııa – «Astana Hab» tehnoparkiniń qatysýshysy. Olar Qazaqstan boıynsha 28 myńnan astam jumys ornyn qamtamasyz etip otyr. Onyń ishinde Playrix, Mytona, NetCracker jáne basqa da quny bir mıllıard AQSh dollarynan asatyn jetekshi jahandyq tehnologııalyq kompanııalar, sondaı-aq tabysty otandyq startaptar – Alaqan bıometrııalyq tólem júıesi (100 myń paıdalanýshy), EdTech CodiPlay startapy (búkil álem boıynsha 600 mektepti qamtıdy), blokcheın blokcheınmen basqarylatyn smart taqtalardy ázirleýshi Citix (Túrkııa men Taıaý Shyǵys naryǵyna shyqty) jáne basqa kompanııalar bar. 2019-2024 jyldar aralyǵynda tehnopark qatysýshylary bıýdjetke 5,5 mlrd teńge salyq tólegen.