Qarýly kúshter ardagerleriniń bastamasymen 1 Keńsaı men Ortalyq zıratta jerlengen ekinshi dúnıejúzilik soǵys batyrlary qabirleriniń basynda is-shara uıymdastyryldy, dep habarlaıdy Egemen.kz.
Oǵan qalalyq qorǵanys isteri jónindegi departamenttiń áskerı qyzmetshileri, «Qarýly kúshterdiń ardagerleri» RQB fılıalynyń basshylyǵy, Saǵadat Nurmaǵambetov atyndaǵy Qurlyq áskerleri áskerı ınstıtýtynyń kýrsanttary, Polıtehnıkalyq ýnıversıtet pen Azamattyq avıasııa akademııasy áskerı kafedrasynyń stýdentteri qatysty.
Qorǵanys mınıstrliginiń baspasóz qyzmetiniń málimdeýinshe Keńsaı zıratynda eki márte Keńes Odaǵynyń batyry avıasııa general-maıory Talǵat Bıgeldınov, Keńes Odaǵynyń Batyry polkovnık Baýyrjan Momyshuly, Keńes Odaǵynyń Batyry, Halyq qaharmany armııa generaly Saǵadat Nurmaǵambetov, Halyq qaharmandary Raqymjan Qoshqarbaev jáne Qasym Qaısenov jerlengen. Aksııaǵa qatysýshylar qabirlerdiń aınalasyn retke keltirip, plıtalar men eskertkishterdi tazartty.
«Bizdiń ákelerimiz ben atalarymyz janqııarlyqpen shaıqasty. Olardyń erligin este saqtaımyz. Maıdangerlerdiń jaýyngerlik jáne ómir joly bolashaq Otan qorǵaýshylar úshin úlgi. Sondyqtan Jeńis kúni qarsańynda zırat basyna kelip, qaharmandardyń rýhyna taǵzym ettik», dedi «Qarýly kúshterdiń ardagerleri» RQB Almaty fılıaly tóraǵasynyń orynbasary otstavkadaǵy polkovnık Tólegen Mustafın.
Sol kúni Almaty qalasynyń Ortalyq zıratynda Azamattyq avıasııa akademııasy áskerı kafedrasynyń stýdentteri aty ańyzǵa aınalǵan ushqysh Keńes Odaǵynyń eki márte batyry avıasııa general-maıory Sergeı Lýganskııdiń qabirine jınaldy. Mundaǵy is-shara Áýe qorǵanysy kúshteri ardagerler keńesiniń tóraǵasy, otstavkadaǵy polkovnık Valerıı Kýzmenkonyń basshylyǵymen ótti.
«Jeńiske 100 kún» aksııasy jalǵasyp jatyr. Oǵan qatysýshylar túrli is-sharalar ótkizip, soǵys ardagerleri men tyl eńbekkerlerine járdem kórsetedi.