AQTAÝ. 11 aqpan. Aqtaý qalasyn abattandyrýǵa jergilikti kásipkerler atsalysatyn boldy. Bul týraly egemen.kz tilshisi habarlady.
Aqtaý qalasynyń ákimi E.Jańbyrshın qalany abattandyrý baǵytynda kásipkerlermen kezdesý ótkizip, oblys ortalyǵynda kásipkerlik isin júrgizip, ózderine tıesili nysannyń aınalasyn abattandyrýǵa jer telimderin alý máselesi zań talaptaryna saı belgili bir ýaqytty jáne qarjyny talap etetindigin aıtty. Osy máseleni joıý úshin abattandyrylýy tıis aýmaqtardy kásipkerlermen memorandýmǵa qol qoıý arqyly sheshý kelisilgenin atap ótti.
– Abattandyrý jumystaryn júrgizý – qalamyz úshin óte ózekti máselelerdiń biri. Aqtaý – jas, kórikti qala. Alaıda, túrli qurylys-jóndeý jumystarynan keıin, klımattyq jaǵdaılardyń áserinen bizde birqatar abattandyrylmaǵan aýmaqtar paıda bolady. Ásirese, qalanyń eski bóliginde. Osy jyly biz qalany abattandyrýdyń konsepsııasyn jasaqtadyq. Bul baǵytta bir shaǵyn aýdandy tolyqtaı abattandyrý (avtoturaq, kólik joldaryn keńeıtý, jaıaý júrginshiler joldaryn salý taǵy s.s.) úshin esebimiz boıynsha 470 mln. teńge jumsalady. Sondyqtan atalǵan jumystarǵa ınvestorlardy da tartýdy kózdeımiz jáne kezeń-kezeńimen jasaýdy josparlap otyrmyz, – degen Edil Terekbaıuly kásipkerlerdiń áleýmettik jaýapkershiligi negizinde qalany abattandyrý jumystary qolǵa alynǵanyn aıtty.
Kezdesý barysynda Aqtaý qalasynyń ákimdigi men kásipkerler arasynda ekijaqty memorandýmdarǵa qol qoıyldy.Kelisimge qol qoıǵan kásipkerler «Royal Cars Aktau» JShS, «Arystan Motors» JShS, «Irsımız» JShS, «Neıron» JShS jáne jeke kásipkerler D.Fomın, Q.Bısalıev, I.Gýrmanaevalar qalany abattandyrýǵa baǵyttalǵan ekijaqty memorandýmnyń áleýmettik-ekonomıkalyq mańyzy zor ekendigine, oblys ortalyǵynyń odan ári kórkeıýine oń yqpalyn tıgizetinine senim bildirdi.
Gúlaıym Shyntemirqyzy.
Derek, sýret: egemen.kz.