ATYRAÝ. 11 aqpan. Atyraý oblysynda turatyn zeınetker Amanjan Muǵalimov ekinshi dúnıejúzilik soǵysta qaza tapqan ákesiniń qabirin Reseı Federasııasynyń aýmaǵynan tapty. Bul týraly egemen.kz tilshisi habarlady.
Zeınetkerdiń ákesi Muǵalim Sultanov 1942 jyldyń 10 qańtarynda soǵysqa attanypty. Onymen birge Qaıyrlap jáne Qaıyrly degen aǵalary da jaýǵa qarsy qolyna qarý alǵan. «Ákem Muǵalim Sultanov soǵysqa ketkende men anamnyń ishinde qalǵan ekenmin. Sheshemiz Tynyshtyq 1943 jyly «qara qaǵaz» kelgen dep otyratyn. Ákemniń aýyldasy Nıet Nuǵymanov degen maıdanger jaralanyp soǵystan oralǵanda atama: «Biz Balashov (Tambov oblysy) maıdanynda jaýǵa qarsy attandyq. Sizdiń balańyz Muǵalimmen birge boldym. Voronej baǵytyndaǵy urysta balańyz jaraqattandy. Jaralylardy arbamen medsanbatqa apara jatqanda, sizdiń balańyzdyń da aty-jónin aıtty» dep kelipti.
Sodan beri qazaq jaýyngeri Muǵalim Sultanovtan esh derek tabylmaǵan. 1943 jyly maıdan joldanǵan «qara qaǵaz» da joǵalyp qalypty. Biraq maıdangerdiń balasy Amanjan Muǵalimov maıdanda qaza tapqan ákesiniń qabirin taýyp, týǵan jerdiń bir ýys topyraǵyn salýdy armandaýmen kelipti. Sonyń reti jaqynda tústi. «Gazetten, telearnalardan maıdanda qazaq tapqandardyń qaıda jerlengenin estip jatamyz. Ákemizben birge maıdanǵa attanǵan Nıet Nuǵymanovtyń Voronej baǵytynda soǵystyq degeni esimde qalypty. Demek, ákemiz osy mańda jaraqat alǵan bolýy kerek degen oıǵa bekindik» degen zeınetker Amanjan Muǵalimov ákesin izdeý maqsatynda 2011 jyldan beri ınternet arqyly Reseıdegi muraǵattarǵa suraý salǵanyn aıtady.
О́tken jyldyń jeltoqsanynda Amanjan qarııanyń qaryndasy Dámelige deregi belgisiz qazaqstandyq maıdangerlerdi erikti túrde izdeýmen aınalysatyn Roman Kójekov súıinshi habar jetkizipti. Onda qazaq jaýyngeri Muǵalim Sultanovtyń Vornej oblysyndaǵy Ertıl qalasyndaǵy baýyrlastar zıratyna jerlengeni habarlanypty. Osy jetisimen maıdangerdiń uly Amanjan qarııa ákesiniń qabirine barýǵa jınalypty. Qyzylqoǵa aýdanynyń ákimdigi jáne osy aýdannan saılanǵan oblystyq máslıhat depýtaty Ádil Jubanovtyń demeýshiligimen jaqynda Amanjan Muǵalimov Vornej oblysynyń Ertıl qalasyna baryp qaıtty.
«Ákem jerlengen Ertıl qalasyndaǵy baýyrlastar zıratyna týǵan jerdiń bir ýys topyraǵyn apardym. Ákemniń arýaǵyna arnap duǵa baǵyshtadym. Sondaǵy derekterge qaraǵanda ákesi 1942 jyldyń 20 shildesinde jaraqatynan qaıtys bolypty. Ákemniń esimindegi bir áriptiń ózgesheligi bolmasa, barlyq derekteri sáıkes kelip tur» deıdi maıdanger ákesin kórmegen, 73 jyldan keıin jerlengen jerin tapqan uly Amanjan Muǵalimov.
Ertıl qalasynyń ákimshiligi atyraýlyq zeınetkerdi qarsylap alyp, mektep oqýshylarymen, ekinshi dúnıejúzilik soǵystyń kýágerleri men jáne turǵyndarmen kezdesý ótkizipti. Reseı Federasııasynyń atynan Jeńistiń 70 jyldyǵyna arnalǵan merekelik medalmen marapattapty. «О́tken jyldyń jeltoqsanynda ákemniń jerlengen jeri týraly habardy estigeli beri uıqym qashyp, tynyshym ketip júr edi. Endi mine, ózin kórmesem de áke rýhyna basymdy ıip qaıttym. Budan bylaı balalarym men nemerelerimdi ertip aparǵym keledi. Urpaǵy atasyn umytpasyn degenim ǵoı», dep óz áserimen bólisti zeınetker Amanjan Muǵalimov.
Joldasbek Shópeǵul.
Derek, sýret: egemen.kz.