Búgin Astana qalalyq máslıhaty depýtattarynyń bir toby «Qazaq gazetteri» seriktestigine arnaıy at basyn buryp, ujymmen kezdesti, dep jazady Egemen.kz.
Kezdesýdi ashqan «Qazaq gazetteri» seriktestigi Bas dırektory Dıhan Qamzabekuly qonaqtarǵa ystyq yqylasyn bildirip, ujym qyzmetkerlerin tanystyrdy.
Atalǵan basqosýda Astana qalalyq máslıhatynyń tóraǵasy Tabıǵat Zeınulqabden bastaǵan depýtattar Kendebaı Adambek, Baýyrjan Qasymbergebaev, Ǵabıt Tájimuratov, Bekzat Joljaqsynov, Dınara Baıserkına sóz sóıledi. Depýtattar bas basylymmen birge ósken urpaq retinde gazette jazylǵan maqalalardy oqyp otyratyndaryn, baspasózge ún qosýǵa qashanda daıyn ekenderin aıtyp, oblys pen aýdandardaǵy jaqsy úrdister, sheshimin tapqan máseleler, máslıhat depýtattarynyń jumystary basylym betterinde jarııalansa degen usynystaryn jetkizdi.
«Sizdermen jumysymyz uqsas. Atqarýshy bılik pen qoǵamnyń arasynda altyn kópir bolyp júrmiz. «Egemen Qazaqstan» gazetinde arnaıy aıdar ashylyp, aptasyna bir ret bolsa da Astana qalalyq máslıhat depýtattarynyń jumystaryn ózderińizdiń qalamdaryńyz arqyly jetkizsek, degen usynysym bar, birlese jumys isteıik», dedi Tabıǵat Zeınulqabden.
Depýtattar gazetpen bala kezderinde eń alǵash ret qalaı tanys bolǵandyqtary týraly estelikterin aıtyp, qazaq baspasóziniń qara shańyraǵyndaǵy júzdesýge rızashylyqtaryn bildirdi.
Bas dırektordyń orynbasary Vıktor Prıanıkov, «Egemen Qazaqstan» gazetiniń bas redaktory Ǵabıt Músirep, bas redaktordyń orynbasary Talǵat Batyrhan jıynda ustazdar men memlekettik qyzmetkerlerdiń baspasózge jazylý úrdisi úzilip bara jatqanyn, jalpy Astana qalasy boıynsha jazylymnyń óte az ekenin alǵa tartyp, jas urpaqty gazet pen kitap oqýǵa tartý baǵytynda jumystar jasalsa degen usynystaryn aıtyp, depýtattardyń ultqa qyzmet jolyndaǵy jumystaryna tabys tiledi.
Jıyn sońynda qalalyq máslıhat depýtattary redaksııa ǵımaratyn aralap, gazet ujymynyń óndiristik jumysyn tamashalady.