Byltyrdan bastap Almaty ákimi Erbolat Dosaevtyń tapsyrmasymen iri sporttyq nysandardy qalanyń balansyna qaıtarý jumystary bastalǵany belgili. Osyǵan baılanysty «Almaty Arena» jáne «Halyk Arena» kópfýnksıonaldy keshenderi kommýnaldyq menshikke ótip, muz aıdynyn paıdalanýdy ashyq uıymdastyrýǵa jáne barlyq sanattaǵy sportshylar úshin arenalarǵa qoljetimdilikti qamtamasyz etýge múmkindik ashyldy, dep habarlaıdy Egemen.kz.
Budan buryn málim bolǵandaı, sporttyq qaýymdastyǵy jekemenshik basqarýyndaǵy iri muz aıdynyna shekteýliligine qatysty másele kóterilgen bolatyn. Mánerlep syrǵanaýshy Mıhaıl Shaıdorov ta qalada mánerlep syrǵanaýdan elimizdiń úzdik sportshylaryn daıarlaý úshin tıisti jaǵdaıdyń jasalmaǵandyǵy týraly málimdegen bolatyn.
Qazirgi kezde muz aıdyny kásibı sportshylarǵa, onyń ishinde Mıhaıl Shaıdorovqa, sport mektepteriniń tárbıelenýshilerine, seksııalar men ulttyq qurama múshelerine de qoljetimdi bola bastady. Bul elimizdiń bolashaq chempıondar býynyn tárbıeleýge septigin tıgizedi.
Almaty ákimdigi qalanyń sport ınfraqurylymyn damytý men jańǵyrtý baǵytynda keshendi tásilderdi iske asyryp jatyr. Sońǵy úsh jylda qalada alty jańa dene shynyqtyrý-saýyqtyrý kesheni salynǵan bolsa, bıyl taǵy tórt keshenniń qurylysy bastalady. Munymen qosa bıyl Ortalyq stadıondy halyqaralyq standartqa sáıkestendirip, syıymdylyǵyn 35 myń orynǵa deıin arttyrýǵa baılanysty qaıta jańartý jumystary bastaldy. «Medeý» bıik taýly muz aıdynynyń ınjenerlik ınfraqurylymyn jańartý, muz sapasyn arttyrý jáne syrǵanaý maýsymyn uzartý baǵytynda, sonymen qatar jasandy ıntellektpen jabdyqtalǵan SmartICE júıesin engizý, jańa qoǵamdyq keńistikter qurý arqyly Medeýdi jyl boıy jumys isteıtin álemdik deńgeıdegi sporttyq-týrıstik ortalyqqa aınaldyrý kózdelip otyr.
Almaty