«Turkistan» telearnasy jasandy ıntellekt arqyly daıyndaǵan alǵashqy anımasııalyq týyndy «Túrkistan saqshylary» dep atalady, dep habarlaıdy Egemen.kz.
Ideıa avtory – telearna qyzmetkeri Ǵasyr Quralbaıuly. Jasandy ıntellektpen jumys isteýdi jetik meńgergen maman mýltfılmniń birinshi serııasyn 7 kúnde jasap shyqqan. Birinshi serııaǵa bar bolǵany 70 myń teńge qarjy jumsalǵan. Ǵasyrdyń aıtýynsha, jasandy ıntellekt baǵdarlamasynyń aqyly nusqasyna jazylýǵa – 100 AQSh dollary, anımasııalyq fılmniń saýndtregin jazdyrýǵa 20 myń teńge jumsalǵan. Sondaı-aq ol mýltfılmniń kelesi serııalary daıyndalyp jatqanyn, bolashaqta kınoteatrlarda kórsetiletin tolyqqandy kommersııalyq mýltfılm túsirýdi josparlap júrgenin aıtty.
Fılm keıipkerleri – Aqpanter jyldam ári batyl barys, Altynqanat – bárin baıqaǵysh búrkit, Tasbatyr ata – ǵasyr jasaǵan aqylgóı tasbaqa. Týyndy sıýjeti qasıetti qala Túrkistandy qaýip-qaterden qorǵap, balalardy adamgershilikke, mádenıettilikke tárbıeleıtin mıfologııalyq keıipkerlerdiń áreketterinen quralǵan.