Búgin Astana qalasynda ónerkásip jáne sýmen jabdyqtaý salasyndaǵy úsh aýqymdy halyqaralyq kórme óz jumysyn bastady. Olardyń qatarynda VI Mashına jasaý jáne metall óńdeýdiń halyqaralyq mamandandyrylǵan Kazakhstan Machinery Fair, SU ARNASY – Water Expo XIV halyqaralyq sý ındýstrııasy kórmesi jáne ONDEU EXPO V halyqaralyq óńdeý ónerkásibi kórmesi bar, dep habarlaıdy Egemen.kz.
Kazakhstan Machinery Fair kórmesiniń saltanatty ashylý rásimine QR О́nerkásip jáne qurylys mınıstri Ersaıyn Naǵaspaev qatysyp, quttyqtaý sóz sóıledi. Mınıstr mashına jasaýdy eldiń ónerkásiptik áleýetiniń negizi, tehnologııalyq damýdyń qozǵaýshy kúshi jáne ulttyq ekonomıkany qoldaýshy mańyzdy sala dep atap ótti. Onyń aıtýynsha, bul salanyń óńdeý ónerkásibindegi úlesi 19%-dy quraıdy, al ótken jyly ósim 9,7%-dy kórsetti. Bıylǵy maqsat – 16%-dyq ósimge qol jetkizý.
Kórmeniń ashylý saltanatyna Chehııa Respýblıkasynyń О́nerkásip jáne saýda vıse-mınıstri Martın Frjelıch, Qazaqstan mashına jasaýshylar odaǵynyń basqarma tóraǵasy Meıram Pishembaev, Leipziger Messe bas dırektory Markýs Gaızenberger jáne Astana Expo kompanııasynyń atqarýshy dırektory Qýanysh Qanapıanov qatysty.
Kazakhstan Machinery Fair – Ortalyq Azııadaǵy eń iri salalyq sharalardyń biri. Onda metall óńdeýge jáne kesýge arnalǵan jabdyqtar, dánekerleý júıeleri, ındýstrııalyq avtomattandyrý men robototehnıka, quraldar, komponentter men óndiristik tehnologııalar tanystyrylýda. Qatysýshylar qatarynda álemdik jáne otandyq alpaýyttar – Hyundai WIA, CHIRON Group SE, KAMAZ, QazTehna, Bodor, ISCAR Kazakhstan, Robentex, Zoller jáne basqa da kompanııalar bar. Germanııa, Túrkııa, Avstrııa, Italııa jáne Qytaı elderi ózderiniń ulttyq ekspozısııalaryn usynyp otyr.
SU ARNASY – Water Expo kórmesi turǵyn úı-kommýnaldyq sharýashylyqty jańǵyrtý, sýmen jabdyqtaý jáne sý burý, aǵyndy sýlardy tazartý, sý resýrstaryn sıfrlandyrý men avtomattandyrý salalaryndaǵy zamanaýı sheshimderge arnalǵan. Kórmege Vogelsang, ANDRITZ, ARC, QA-Plast, VodEcoFilter syndy kompanııalar qatysyp jatyr.
Al ONDEU EXPO kórmesi metallýrgııa, mashına jasaý, aspap jasaý, qurylys materıaldary, hımııa jáne agroónerkásiptik keshen salalaryna arnalǵan jabdyqtar men tehnologııalardy usynady. Bul alańda otandyq óndiristiń ónimdiligi men tehnologııalyq táýelsizdigin arttyrýǵa baǵyttalǵan sheshimder kórsetilip jatyr.
Atalǵan kórmeler 10 000 m² astam aýmaqta ótip jáne olarda 22 elden kelgen 290-nan astam kompanııa óz ónimderi men ınnovasııalyq sheshimderin usynylǵan. Kórmelerge zaýyt basshylary, ınjenerler, ónerkásiptik tehnologııa ázirleýshiler, memlekettik qurylymdar ókilderi men sala mamandary qatysyp jatyr. Is-sharalar aıasynda túrli forýmdar, tehnıkalyq konferensııalar men jelilik sessııalar ótkizý josparlanǵan.