Kóregen Prezıdentimiz búkil álemdi jaılaǵan daǵdarys zardabynyń kete qoımaǵan, geosaıası epısentr aımaǵyndaǵy turaqsyzdyq teketiresiniń shıelenise bastaýy, eksporttyq shıkizat baǵasynyń tómendeýi bizdiń elimizge de óz qaterin tóndirý múmkindigin eskere otyryp, jyldaǵydan erterek «Nurly Jol – bolashaqqa bastar jol» – Jańa Ekonomıkalyq Saıasaty týraly Joldaýyn jarııalady. Atalǵan qaterlerdi eskere otyryp jasalǵan bul Joldaý partııamyzdyń saılaýaldy tuǵyrnamasynyń oryndalýyn qamtamasyz ete otyryp, elimizdiń ekonomıkasyn kóterýge yqpal eteri sózsiz.
Halqymyzdyń kóńilinen shyǵyp júrgen Elbasynyń ótken jyldardaǵy Joldaýlarynyń, ásirese, aldymyzǵa uly maqsat qoıǵan «Qazaqstan joly – 2050» atty Joldaýyndaǵy álemniń eń úzdik damyǵan 30 eliniń qataryna qosylý maqsatynyń qozǵaýshy kúshi, demeýshisi desek artyq aıtqandyq emes.
Sózimiz dáleldi bolý úshin, bilekke qýat, júrekke shýaq syılaǵan bul Joldaýdyń máni tereń, maqsaty kemel barlyq baǵdarynan halqymyzdyń áleýmettik salasynyń jáne el ekonomıkasynyń jahandyq talapqa saı órkendeý múmkindikterine úlken yqpal tıgizetini sezilip turǵandyǵyn aıtsaq ta jetkilikti.
Bul talaptardyń oryndalý jolyn Prezıdentimiz erterekte Ulttyq qor qurý arqyly júıege keltirip qoıǵan, endi sol qanattyǵa qaqtyrmaı, tumsyqtyǵa shoqtyrmaı tirnektep jınaǵan qarajatty daǵdarys kezinde el ekonomıkasynyń turaqty damýyna baǵyttap otyr. Elbasymyzdyń bul kóregendik saıasatynyń paıdasyn 2007-2009 jyldardaǵy búkil álemdi jaılaǵan daǵdarys kezinde kórgenbiz, tánti bolǵanbyz.
Men mıllıondaǵan aýyl turǵyny jerdiń tósin emgen dıqan retinde kásipkerlikti shaǵyn jáne orta bıznesti damytý maqsatyndaǵy «Jumyspen qamtýdyń jol kartasy-2020», «Agrobıznes-2020», «Sybaǵa», «Altyn asyq», «Qulan» baǵdarlamalarynyń orta jolda qalyp qoımaı, qarqyndy damıtyndyǵyna senimim nyǵaıa túskenin jasyrmaımyn. Elimiz agrarly memleket bolǵandyqtan, halqymyzdyń turmys jaǵdaıyn jaqsartý osy baǵdarlamalar júzege asqanda ǵana oryndalatyny sózsiz.
Turǵyn úı-kommýnaldyq jáne ınfraqurylymdardy nyǵaıtý maqsatyn ınvestısııa tartý arqyly qajettilikterdi qalpyna keltirý, onyń ishinde az paıyzben kópjyldyq nesıe berý, bastapqy jarnanyń bolmaýy, jalǵa berý tetikteri árbir úıi joq, kúıi joq qazaqstandyq azamattyń júregine nur quıary sózsiz.
Qazirgi oryn alyp otyrǵan jaǵdaılarǵa baılanysty, endi qarjyny keleshekte tabys ákeletin, al osy kezeńde halyqty jumyspen qamtamasyz etetin salalarǵa bólip otyr. Ol kóliktik, energetıkalyq, ındýstrııalyq jáne áleýmettik ınfraqurylymdardy, shaǵyn jáne orta bıznesti damytý baǵyttary. Iаǵnı, Qazaqstannyń barlyq aımaqtarynan túrli jol qatynastary arqyly taýar aınalymynyń kedergisiz baılanysýyn qamtamasyz etý, múmkindik týǵyzý.
Joldaýdyń áleýmettik ınfraqurylymdardy damytý taraýyndaǵy «Birinshi kezekte, bul – apatty mektepter men úsh aýysymdy oqytý problemasyn sheshý, mektepke deıingi mekemelerdegi oryndar tapshylyǵyn qysqartý», dep, ǵylym salasyn ındýstrııalandyrý maqsatynda joǵary oqý oryndarynyń materıaldyq-tehnıkalyq bazasyn nyǵaıtýǵa, qomaqty qarjy bólýdi Úkimetke tapsyrdy.
Osyndaı áleýmettik reformalardy retke keltire otyryp, Prezıdentimiz «Bizdiń bilim berýdi, densaýlyq saqtaýdy, aýyl sharýashylyǵyn damytý baǵdarlamalarymyz jalǵasa beredi», «Nurly Jol» Jańa Ekonomıkalyq Saıasaty álemniń eń damyǵan 30 eliniń qataryna ený jolyndaǵy bizdiń aýqymdy qadamymyz», dep baǵdarlamanyń jalǵasa beretindigin, aldaǵy maqsattarymyzǵa jetý joldaryn taǵy da bir aıqyndap berdi.
Qazaq eliniń nebári shırek ǵasyrǵa jýyq ýaqytta kúlli álemge tanylýy, ekonomıkasynyń qaryshtap ósýi elimizdegi yntymaq pen tatýlyqtyń arqasy ekenin aıtyp, ata-babalarymyzdyń salǵan sara jolyn, «Máńgilik El» ıdeıasyn tabyspen jalǵastyra berýge shaqyrdy.
Men de «Nur Otan» partııasynyń múshesi retinde Elbasy Joldaýynyń tereń maǵynaly ekenin túısinip qana qoımaı, ony bolashaǵymyzdyń jarqyn kórinisi retinde qabyldadym.
Turǵanbek QANAEV,
«Qurmet» ordeniniń ıegeri, «Aq orda» sharýa qojalyǵynyń tóraǵasy.
Ońtústik Qazaqstan oblysy,
Shardara aýdany,
Alataý batyr aýyly.