Mektepterde tamaqtanýdyń jańa standarty engiziledi. Endi elimizdegi barlyq orta bilim uıymynda ǵylymı negizdelgen biryńǵaı as máziri bolady. Bul oqýshylardyń densaýlyǵyn saqtaý jáne sapaly bilim alýǵa jaǵdaı jasaý úshin qolǵa alynyp otyr, dep habarlaıdy Egemen.kz.
Jańa standart Oqý-aǵartý jáne Densaýlyq saqtaý mınıstrlikteri birlesip, Qazaq taǵamtaný akademııasy men sarapshylar tobynyń qatysýymen ázirlengen. Astanada ótken dóńgelek ústel barysynda osy standarttyń negizgi qaǵıdalary tanystyrylyp, bilim berý uıymdaryna engizý joldary jan-jaqty talqylandy. Is-sharada sóz sóılegen Oqý-aǵartý mınıstri Ǵanı Beısembaev elimizdegi barlyq mektepke ǵylymı negizdelgen biryńǵaı as mázirin engizý oqýshylardyń densaýlyǵyn saqtaý jáne sapaly bilim alýǵa jaǵdaı jasaý jolyndaǵy mańyzdy bastama ekenin atap ótti.
«Balalardyń qaýipsizdigi men densaýlyǵy – memleket saıasatynyń basty baǵyttarynyń biri. Durys tamaqtaný mádenıetin qalyptastyrý – bolashaq ult saýlyǵynyń kepili. Memleket basshysynyń qoldaýymen mektepterde tegin tamaqtandyrý júıesi engizildi. Endigi basty maqsat – beriletin taǵamnyń sapasy men qaýipsizdigin tolyq qamtamasyz etý. Bul úshin tıisti zańnamalyq negiz qalyptastyryldy, endi jergilikti atqarýshy organdar standartty ary qaraı júzege asyrýdy qamtamasyz etýi tıis», dedi mınıstr.
2023 jyldan bastap elimizde bastaýysh synyp oqýshylary men áleýmettik turǵydan osal sanattaǵy balalarǵa tegin ystyq tamaq berilip keledi. Bıylǵy oqý jylynda osy qamqorlyqtyń ıgiligin 1,7 mıllıonǵa jýyq bala kórdi.
Oqý-aǵartý mınıstrliginiń deregine súıensek, mektep ashanalaryndaǵy qyzmet sapasyn arttyrý úshin zańnamalyq talaptar aıtarlyqtaı kúsheıtildi. Atap aıtqanda, tamaqtanýǵa quqyly oqýshylardyń esebi áleýmettik ámııan júıesi arqyly avtomattandyryldy, qoǵamdyq baqylaý tetikteri keńeıtildi, tamaqtandyrýdy uıymdastyrý qaǵıdalary jetildirilip, jańa standart bekitildi. Aıta keteıik, mekteptegi tamaqtanýdyń jańa standarty 2025 jyldyń 1 qyrkúıeginen bastap resmı túrde qoldanysqa enedi.