Qazaqstanda týyp-óskenime qýanamyn

Elbasymyz Nursultan Nazar­baev­tyń halyqqa arnaǵan Joldaýynda aıtqan myna sózderi meni erekshe baýrap aldy, ári sol joldar ózimdi alǵa jeteleýge septigin tıgizdi desem artyq aıtqandyq emes: «Biz eń laıyqty degen jastardyń shetelderde bilim alýlaryna járdem jasaımyz. Jyl saıyn úsh myń úzdik stýdentke «Bolashaq» baǵdarlamasynyń sheńberinde álemniń ilgeri joǵary oqý oryndarynda bilim alýlary úshin respýblıkalyq bıýdjetten qarajat bólinetin bolady». Osy sózderdi estigende men qatty qýandym jáne osy baǵdarlama aıasynda shet elde bilim alǵym kelip, talaptana bastadym. Kópshilik oılap júrgendeı bul Prezıdenttik jobaǵa tek jaǵda­ıy­ jaqsy otbasylardyń balala­ry ǵana barady degen sóz asyra­ aıtylǵan sııaqty. Men Merki aýda­­nyndaǵy qarapaıym ǵana otbasynan shyq­qan­myn. 2001 jyly M.H.Dýlatı atyn­daǵy TarMÝ-di bitirdim, 2004 jyly «Bolashaq» stıpendııasyna úmitker retinde tirkelip, bul armanǵa  2005 jyly qol jetkizdim. Sóıtip, elden alǵan bilimimdi sheteldegi irgeli oqý ornynda jalǵastyrdym. Men bilim alǵan Ulybrıtanııadaǵy Lıds ýnıversıteti – tarıhy sonaý tereń­de jatqan jáne álemdegi reıtıngi­si joǵary aldyńǵy qatarly oqý oryndarynyń biri. Árıne, syrt eldegi tanymal oqý ornynda oqýǵa múmkindik alǵanymdy meniń baǵymnyń janǵany dep aıtsam da bolar. Menimen birge oqyǵan kýrstastarymnyń arasynda Pákistan, Úndistan, AQSh, Meksıka, Qytaı jáne Tájikstan, Moldova sekildi elderdiń ókilderi de boldy. Shyny kerek, olar meni elimiz arnaıy grant bólip jiberip otyrǵandyǵyn aıtqanymda erekshe tańdanys bildirip, qyzyǵyp ta, qyzǵanyp ta qaraǵandaı boldy. Sebebi, olar óz qarajattarymen, keıbiri ha­lyq­aralyq qorlardyń qarjylaı qol­da­ýymen bilim alyp jatqandar edi. Shet­el­dikterge bizdiń eldegi «Bolashaq» halyqaralyq baǵdarlamasy jaıly aıtyp bergenimde, olar bizdiń elge súısine qarady. Memleketimizdiń jylyna 3000 jasqa bilim alýǵa múmkindik berip otyrǵany qasymdaǵy kýrstastarymdy erekshe qyzyqtyrdy. Osylaısha men ózimniń bolashaq urpaǵyna beıjaı qaraı almaıtyn, keleshekke senimmen kóz tastaıtyn eldiń urpaǵy ekenime, Qazaqstanda týyp-óskenime qýandym. Olga ChERKASOVA, Taraz memlekettik pedagogıkalyq ınstıtýtynyń shet tilderi kafedrasynyń aǵa oqytýshysy. Jambyl oblysy.