ATYRAÝ. 12 aqpan. Atyraý oblysynyń mamandandyrylǵan aýdanaralyq qylmystyq sotynyń óz tanysyn qatigezdikpen óltirýshini 15 jylǵa sottaýǵa shyǵarǵan úkimi ózgerissiz qaldyryldy. Bul týraly oblystyq sottyń baspasóz qyzmeti habarlady.
Buǵan deıin, ıaǵnı, byltyrǵy 12 jeltoqsanda birinshi satydaǵy sottyń shyǵarǵan úkimimen óziniń tanysyn asa qatigezdikpen óltirýshi qylmystyq áreketi úshin kináli dep tanylyp, oǵan 15 jylǵa bas bostandyǵynan aıyrý jazasy taǵaıyndalǵan edi. Sottalýshynyń túrmede otyrý merzimin qatań rejımdegi túzeý kolonııasynda óteý belgilengen bolatyn.
«Keshe, ıaǵnı, 11 aqpanda bul is Atyraý oblystyq sotynyń qylmystyq ister jónindegi apellıasııalyq sot alqasynyń sýdıasy M.Erǵazıevtyń tóraǵalyǵymen ótken ashyq sot otyrysynda qaraldy. Sot otyrysynda Qylmystyq Kodekstiń 96-baby, 2-bóliginiń «d» tarmaqshasymen (Asa qatigezdikpen kisi óltirý) sottalýshy men onyń qorǵaýshysynyń jáne jábirlenýshi jaq ókiliniń Atyraý oblysy mamandandyrylǵan aýdanaralyq qylmystyq soty shyǵarǵan úkimge qatysty apellıasııalyq shaǵymy qanaǵattandyrýsyz, al birinshi satydaǵy sottyń úkimi ózgerissiz qaldyryldy», dep habarlady oblystyq sottyń baspasóz hatshysy Boranbaı Ǵalıev.
Apellıasııalyq sot qaýlysy jarııalanǵan sátten bastap zańdy kúshine endi.
Joldasbek Shópeǵul.
Derek: Atyraý oblystyq sotynyń baspasóz qyzmeti.
Sýret: Rahym Qoılybaev.