Elimizdiń 15 óńirinen 200-den astam jastyń basyn qosqan respýblıkalyq forýmǵa jumysshy mamandyqtary boıynsha oqyp jatqan stýdentter, kásiporyn qyzmetkerleri men kásipodaq ókilderi qatysyp jatyr, dep habarlaıdy Egemen.kz.
Forýmnyń saltanatty ashylýynda Atyraý oblysynyń ákimi Serik Shápkenov pen QR Mádenıet jáne aqparat mınıstrliginiń Jastar jáne otbasy isteri komıteti tóraǵasynyń orynbasary Birjan Álimjanov qatysýshylarǵa sáttilik tilep, jumysshy mamandyqtarynyń qoǵamdaǵy mańyzyn atady.
О́z kezeginde Serik Shápkenov forýmnyń kásibı damý alańy ǵana emes, jańa ıdeıalar men úlken múmkindikterge jol ashatyn biregeı platforma ekenin atap ótti.
«Qurmetti jastar! Sizder – elimizdiń naqty tiregi, ekonomıkamyzdyń qozǵaýshy kúshi, el erteńiniń ıesi sanalatyn eńbek maıdanynyń jas sarbazysyzdar. Memleket basshysynyń 2025 jyldy Jumysshy mamandyqtarynyń jyly dep jarııalaýy – qoǵamda eńbekqorlyq pen kásibı sheberlikti ulyqtaýǵa baǵyttalǵan tarıhı sheshim. Atyraý oblysy – Qazaqstannyń eń iri ındýstrııalyq-óndiristik aımaqtarynyń biri. О́lkemizde álemdik deńgeıdegi óndiris oryndarynyń qatysýymen elimizdiń munaı-gaz salasyndaǵy irijobalar júzege asyrylyp jatyr. О́ndiris oshaqtaryn iske qosatyn da, ekonomıkanyń naqty sektoryn alǵa súıreıtin de – jumysshy mamandardyń qajyrly eńbegi men kásibı sheberligi. Sondyqtan búgingi forým osy baǵyttaǵy maqsat-múddelerdi júzege asyrý jolyndaǵy mańyzdy alań bolaryna senimdimin», dedi S.Shápkenov.
Forým aıasynda «Qazaqstannyń eńbek naryǵy jáne jumysshy mamandyqtarynyń keleshegi» atty plenarlyq otyrys pen TEDx úlgisindegi «Isker talks» konferensııasy ótti. Qatysýshylar úsh baǵytta oqytý kýrstarynan ótip, trenıngterge qatysty. Spıker retinde QR Parlamentiniń depýtattary, mınıstrlikter men iri kompanııalardyń ókilderi shaqyryldy.
Sondaı-aq jastar jańadan ashylǵan «Atyrau faces» jumysshy mamandyqtar kórmesin tamashalady. Forým sońynda jumysshy jastar alleıasy ashylyp, eń úzdik jobalarǵa jalpy 3 mıllıon teńge kóleminde mını-granttar tabystalmaq.
Aıta keteıik, Atyraý oblysyndaǵy 24 tehnıkalyq jáne kásiptik bilim berý uıymynyń 18-i jumysshy mamandyqtaryna mamandar daıarlaıdy. Jastarǵa 3600-den astam memlekettik grant bólingen.