Jeńistiń 80 jyldyǵyna arnalǵan saltanatty sherýge elimizdiń ár túkpirinen kelgen áskerı qurylymdar asqan jaýapkershilikpen sap túzep jatyr. Búgin Qazaqstan Respýblıkasy Qarýly Kúshteri Áýe qorǵanysy kúshteriniń 19132 áskerı avıasııalyq bazasy sherýge daıyndyq barysyn kórsetti, dep habarlaıdy Egemen.kz.
Bazanyń aýmaǵynda qarbalas tirshilik. Ár buıryq – naqty, ár qozǵalys – úılesimdi. Munda tek áskerı tártip qana emes, júrektegi senim men ult aldyndaǵy jaýapkershilik bılik qurǵan.
19132 áskerı bazasynyń ujymy sherýge qatysýǵa daıyndyqty bir aı buryn bastaǵan. Paradqa 66 túrli áýe tehnıkalary jumyldyrylǵan. Olardyń qatarynda tikushaqtar, maıdan, áskerı kólik jáne armııalyq avıasııa bar. Sonymen qatar, rezervtik ushaqtar men ekıpajdar qamtamasyz etilgen.
Tehnıkalyq qyzmet kórsetý bólimi kún saıyn tańnan keshke deıin jumys istep, árbir ushaqtyń ushý jaramdylyǵyn muqııat tekserip otyr. Qozǵaltqyshtar men basqarý júıeleri, qarý-jaraq pen baılanys quraldary, tipti ushaq syrtyna jaǵylatyn boıaý men emblemaǵa deıin parad talaptaryna saı jańartylǵan. Bul kórermen úshin kóz tartarlyq kórinis bolsa, áskerı ujym úshin maqtanysh pen minsiz sapanyń kórinisi.
Tehnıka qanshalyqty myqty bolsa da, ony kókke kóteretin – ushqysh. Árqaısy parad sapynda ushyp shyǵý tek mansaptyq mártebe emes, júrekpen sezinetin úlken jaýapkershilik ekenin atap ótti. Olar kún saıyn birneshe saǵat boıy áýede jattyǵyp, saptyq ushýlardy pysyqtaý ústinde. Aıta keteıik, buǵan deıin bes oqý-jattyǵý jıynyn ótkizgen. Áskerı sherýge deıin shamamen taǵy úsh jattyǵý ótkiziledi dep josparlanǵan.
«Avıasııa úshin kez kelgen ushyp kóterilý belgili bir dárejedegi táýekel. Sol táýekelderdi barynsha azaıtý úshin eń aldymen barlyq daıyndyq jer ústinde muqııat júrgiziledi. Áýe kúshteriniń ushý quramdary birlesken áreketti jetildirý maqsatynda oqý-jattyǵý jumystaryn júrgizip jatyr. Qazir ekıpajdardyń úılesimdi jumysyn arttyrýǵa basymdyq berilgen», dedi Áýe kúshteri qolbasshysynyń ınjenerlik-avıasııalyq basqarmasynyń aǵa ınjener-ınspektory, maıor Azamat Temirǵalı.
Bıyl áskerı sherýge Qazaqstan Qarýly Kúshteriniń Áýe qorǵanysy kúshterinen 1301 adam qatysady. Onyń ishinde 531 áskerı qyzmetshi – jaıaý saptyq quramda, 178 – ushý quramynda, 22 – mehanıkalandyrylǵan kolonna ekıpajynda, 570 – qamtamasyz etý bólimderinen. Sonymen qatar paradqa túrli urys tártibinde sap túzeı otyryp, A-400M, L-410, L-39NG sekildi alǵash ret qatysyp otyrǵan zamanaýı ushaqtar qatysady. Sherý sońynda 6 Sý-25 ushaǵy Qazaqstannyń Memlekettik Týy beınelengen tútin jolaqtaryn qaldyryp, áýedegi paradty túıindeıdi.