Qazaqtyń birtýar ǵalymy Shoqan Ýálıhanovtyń týǵanyna 190 jyl tolýyna oraı «Shoqany bar eldiń – shoqtyǵy bıik» atty taǵylymdy kórme ashyldy. Kórmege Memlekettik ortalyq mýzeı men Almaty oblysy, Kerbulaq aýdanyndaǵy Sh.Ýálıhanovtyń «Altynemel» memorıaldyq mýzeıi qorynan, sondaı-aq muraǵat qorynan alynǵan biregeı jádigerler qoıyldy.
Kórmede ǵalymnyń Memlekettik ortalyq mýzeı qorynda saqtalǵan jeke buıymdary, qoljazbalary jáne shyǵarmalary, sondaı-aq ol týraly jaryq kórgen kitaptar men basylymdar nasıhattaldy. Ásirese Shoqannyń bórigi men myltyǵynyń dúmi, Qashqar saparynan ákelgen qytaı qumyrasy, saparda alyp júrgen joltorsyǵy jáne «Altynemel» memorıaldyq mýzeıinen ákelingen mys tostaǵany, kúmis qasyǵy, parsha belbeýi kórermen nazaryn aýdarady.
Sol sekildi Shoqan Ýálıhanovtyń IV dárejeli áýlıe Vladımır ordeni, Orys geografııalyq qoǵamynyń tolyq múshesine saılanǵandyǵy týraly dıplomy (kóshirmesi), sondaı-aq ekspedısııasy barysynda ákelingen baǵaly tastary da kórnekti jádigerler qatarynan tabylǵan.
Kórmeniń eleýli bóliginen Shoqannyń týysqandaryna qatysty eksponattar oryn alǵan. Atap aıtqanda, qaryndasy Tájibaıdyń aqqý terisinen tigilgen biregeı ishigi, ápkesi Ápııaniń kóılegi, qaryndastary Bádiǵuldyń beshpenti, Nurılanyń oramaly, naǵashysy Isa Shormanovtyń shekpeni kórme mańyzyn asha túsken.
Mazmundy jobanyń eleýli bóligi N.Tretıakov, N.Hlýdov, P.Dıakov syndy qylqalam sheberleriniń Shoqannyń portretteri men sol zamannyń kórinisin beıneleıtin shyǵarmalaryna arnaldy. Kórme aıasynda ótken «Shoqannyń ǵylymı ónegesi» atty dóńgelek ústelde ǵalymnan qalǵan muranyń máni men mańyzy, onyń ıgerilýi týraly qundy derekter aıtyldy. Tarıhshy Samat О́tenııazov Shoqan Ýálıhanovtyń eńbekteri áli kúnge deıin tolyq jınaqtalyp, júıelenbegenin, bul jaǵdaı ǵalymnyń ǵylymı murasyn tolyqqandy zertteýge kedergi keltirip otyrǵanyn atap ótti. Onyń aıtýynsha, Shoqan murasyn zertteıtin mamandardy daıarlaý úshin arnaıy oqý baǵdarlamalaryn engizý jáne ǵylymı zertteý jumystaryn keń kólemde qoldaý qajet.
ALMATY