Qaradala óńirindegi Shonjy aýylynda qazaqtyń aqıyq aqyny Muqaǵalı Maqataev pen uıǵyr etnosynyń talantty aqyny Ilıa Bahtııaǵa (Molotov) arnalǵan «О́leń men dostyq – eskertkishke aınalǵan rýh» atty kompozısııalyq eskertkishtiń saltanatty ashylý rásimi ótti.
Sharaǵa Uıǵyr aýdanynyń ákimi Bota Eleýsizova, Almaty oblysy mádenıet, arhıvter jáne qujattama basqarmasynyń basshysy Danııar Álıev, Muqaǵalı Maqataevtyń uly Juldyz Maqataev pen Ilıa Molotovtyń týǵan baýyry Sýnıat Paltýshaev, sonymen birge Almaty oblysynyń Qurmetti azamaty, ardager Yzǵarbek Bektursynov, aqyn, dramatýrg Baqyt Bedelhan qatysty.
Saltanatty jıynda sóz alǵan meımandar Muqaǵalı men Ilıanyń dostyǵyn, qos aqynnyń poezııa men rýhanııat jolyndaǵy uly mıssııasyn erekshe atap ótti. Dostyq pen birlikti jáne rýhanı úndestikti aıqyndaǵan mádenı sharada eskertkishtiń lentasy qıylyp, gúl shoqtary qoıyldy.
Budan keıin Qaradala halyq teatrynyń qatysýymen «Dosym, saǵan aıtamyn...» atty shaǵyn prolog qoıylyp, Muqaǵalı men Ilıa beıneleri kórermenniń júregin tebirentti.
Qos aqynnyń ajyramas dostyǵy týraly az aıtylmaǵan. Olar Máskeýde birge oqyp, odan keıingi jyldarda da aınymas dosqa aınalǵany aqıqat. Sol sebepti, qos aqynǵa Qaradala tórinen eńseli eskertkish qoıý kópten beri kóterilip kelgen. Bul eskertkish – poezııaǵa, adal dostyq pen baýyrlastyqqa qoıylǵan taǵzym, bolashaq urpaq úshin rýhanı mura sanalady.
Almaty oblysy.