ASTANA. 12 aqpan. Astanalyq «Barys» hokkeı komandasy syrt aıdynda novokýzneskilik «Metallýrgtan» (Reseı) oıyn sońyndaǵy býllıt arqyly jeńildi. Bul týraly egemen.kz habarlady.
Oıynnyń nebári 2-mınýtynda qonaqtar esep ashty. Kevın Dallmen men Oskars Bartýlıs bastaǵan shabýylǵa núkte qoıyp, kók jolaqtyń boıynan tamasha soqqy jasaǵan Oleg Kvasha komandasyn alǵa shyǵardy. Kvasha úshin bul «Barys» sapyndaǵy bıylǵy maýsymnyń alǵashqy shaıbasy. Osy goldan keıin «Metallýrgtyń» bas jattyqtyrýshysy German Tıtov qaqpashysyn aýystyryp, Rafael Hakımovtyń ornyna Nıkıta Lojkındi shyǵardy.
Esepte alǵa shyqqan astanalyqtar oıyndy óz baqylaýlarynda ustap, birneshe joıqyn shabýyldar uıymdastyrdy. Tipti, esepti eseleıtin de tamasha múmkindik bolǵan edi. Alaıda, qaqpashymen betpe-bet shyqqan Talǵat Jaılaýovqa sáttilik jetispedi. Aıdyn ıeleri úziliske bir mınýt qalǵan kezde ǵana esepti teńestirýge múmkindik tapty. Mıhaıl Plotnıkovtan pas alǵan Aleksandr Komarıstyı «Barys» qaqpashysy Pavel Polýektovtan aılasyn asyrdy.
Ekinshi kezeń asa tartysty ótkenimen, tablodaǵy esep ózgergen joq. Kelesi sheshýshi kezeńde Andreı Nazarovtyń shákirtteri belsendi kórindi. Tipti 48-mınýtta Nıkolaı Antropovtan pas alǵan Roman Starchenko komandasynyń ekinshi shaıbasyn soǵyp, «Barys» taǵy da alǵa shyqty. Arada úsh mınýt ótkende novokýzneskilikter tarazy basyn ekinshi ret teńestirdi. Bul sátte «Barys» sapynan Naıdjel Doýs eki mınýttyq aıyp ýaqytymen jazalanyp, «Metallýrg» oıynshy basymdyǵyna ıe bolǵanyn aıta keteıik. Atalǵan goldyń avtory Sergeı Dorofeev.
Negizgi ýaqyt 2:2 esebimen aıaqtalyp, qarsylastar 5 mınýttyq qosymsha taımǵa júgindi. Degenmen, bul kezeńde esep ózgermeı, jeńimpaz oıyn sońyndaǵy býllıt arqyly anyqtaldy. Býllıtti «Barys» oıynshylary bastady. Alǵash bolyp Roman Starchenko shaıbaǵa jaqyndady. Alaıda, bul jekpe-jekte «Metallýrg» qaqpashysy Nıkıta Lojkınniń sheberligi basym boldy. О́z kezeginde aıdyn ıeleri sapynan amerıkalyq legıoner Keıd Feırchaıld Polýektovtan ońaı aılasyn asyryp, komandasyn oıyn barysynda alǵash ret esepte alǵa shyǵardy. О́kinishke qaraı, «Barys» sapynan Konstantın Pýshkarev pen Naıdjel Doýs ta Starchenkonyń kebin qushyp, óz múmkindikterin paıdalana almady. Sonyń nátıjesinde, novokýzneskilik komanda jalpy oıynda 3:2 esebimen jeńiske jetti.
«Barys» ázirge 78 upaımen Shyǵys konferensııasyndaǵy 6-ornyn saqtap tur. Osy konferensııadaǵy basty básekelesimiz ýfalyq «Salavat Iýlaev» 77 upaımen ókshemizdi basyp keledi. Astanalyqtar Qurlyqtyq hokkeı lıgasyndaǵy kelesi oıynyn 13 aqpan kúni Novosıbırskiniń «Sıbırine» qarsy ótkizedi.
Aıta keter jaıt, qazirdiń ózinde Qurlyqtyq hokkeı lıgasynyń turaqty chempıonatyn jeńip alǵan komanda belgili. Sońǵy oıynyn slovakııalyq «Slovan» komandasyna qarsy ótkizgen máskeýlik SSKA qarsylastarynyń qaqpasyna jaýapsyz 12 shaıba soǵyp, rekordty eseppen jeńiske jetti. QHL tarıhynda buryn-sońdy 12:0 esebi tirkelmegen edi. Pleı-off satysyna deıin áli 6 týr qalǵanyna qaramastan, máskeýlikter osy jeńisinen keıin jalpy týrnır kestesinde top jardy. Olardyń qorjynynda búginde 129 upaı bar.
Elaman Qońyr.
Derek: egemen.kz.
Sýret: metallurg-nk.ru.