ASTANA. 12 aqpan. Ispanııanyń Granada qalasynda ótip jatqan qysqy Ýnıversıada oıyndarynda hokkeıden erler arasyndaǵy básekede Qazaqstan quramasy jartylaı fınalǵa shyqty. Bul týraly egemen.kz habarlady.
Shırek fınalda hokkeıshilerimiz Japonııa quramasymen kúsh synasty. Bul Azııadaǵy basty qarsylasymyz sanalatyn Japonııamen osy Ýnıversıadadaǵy ekinshi oıynymyz. Buǵan deıin toptyq kezeńde 3:2 esebimen jeńgenimizdi aıta keteıik. Al tobymyzdaǵy kelesi komanda AQSh-tan oıyn sońyndaǵy býllıt arqyly 3:2 esebimen jeńilýge májbúr boldyq. Desek te, bul jeńilis bizdiń quramaǵa «S» tobynda birinshi oryn alýǵa esh kedergi bolmady.
Shırek fınaldyq oıynda qazaqstandyq hokkeıshiler kún shyǵys eliniń qaqpasyna 4 shaıba soqty. Onyń ekeýi alǵashqy kezeńde tirkeldi. Oıynnyń 8-mınýtynda Dáýlet Kenbaev pen Nursultan Belgibaev uıymdastyrǵan shabýyl Iýlııan Popovıchtiń dál soqqysymen aıaqtaldy. Arada 3 mınýt ýaqyt ótken kezde Mıhaıl Kachýlın mergendigimen kózge túsip, komandamyzdyń ekinshi shaıbasyn soqty.
Kelesi kezeńde japondyqtar aıtarlyqtaı qarsylyq kórsetti. Oıynnyń 27-mınýtynda Mıhaıl Smolnıkov qorǵaǵan qaqpadan sańylaý tapqan japondar Shýn Tatedanyń mergendigimen esepti qysqartty.
Al úshinshi kezeń tolyǵymen Qazaqstannyń basymdyǵymen ótti. Kezdesýdiń 47-mınýtynda Danııar Ahmetovten pas alǵan Vladıslav Elakov esepti 3:1-ge jetkizdi. Japonııanyń bas jattyqtyrýshysy tartystyń aıaqtalýyna 2 mınýt qalǵan kezde qaqpashy Shýn Hıtomıdiń ornyna altynshy oıynshyny shyǵardy. Alaıda, onyń bul áreketi oń nátıje bermeı, 59-mınýtta Vladımır Grebenshıkov bos qaqpany dál kózdep, komandamyzdyń 4-shaıbasyn soqty. Nátıjesinde, 4:1 esebimen iri jeńiske qol jetkizgen Qazaqstan quramasy jartylaı fınalda oınaý múmkindigine ıe boldy. Bul kezeńdegi qarsylasymyz Chehııa quramasy. Qos komanda arasyndaǵy tartys 13 aqpan kúni ótedi. Kelesi jartylaı fınaldyq básekede Kanada men Reseı sheshýshi synǵa beriler joldamany sarapqa salady.
Ýnıversıada oıyndary 14 aqpanda aıaqtalatyny belgili. Ázirge qorjynymyzda 5 altyn jáne 5 kúmis medal bar. Bul kórsetkishpen jalpy komandalyq týrnır kestesinde ekinshi orynda kelemiz. Kósh basyna 17 altyn, 15 kúmis jáne 17 qola medali bar Reseı jaıǵasqan. Al úzdik úshtikti Germanııa sportshylary túıindep tur. Olardyń enshisinde 3 altyn, 3 kúmis jáne 1 qola medal bar.
Elaman Qońyr.
Derek: egemen.kz.
Sýret: granada2015.org.