ASTANA. 12 aqpan. Búgin tús aýa Qazaqstan Prezıdenti Nursultan Nazarbaev pen Belarýs Prezıdenti Aleksandr Lýkashenko telefon arqyly sóılesti. Bul týraly Aqordanyń baspasóz qyzmeti habarlady.
A.Lýkashenko Reseı, Ýkraına, Fransııa Prezıdentteriniń jáne Germanııa Kansleriniń Mınskide «normand formatynda» ótkizgen kelissózderiniń qorytyndylary týraly aıtty.
Qazaqstan Prezıdenti ózin habardar etkeni úshin alǵys bildirdi jáne kezdesýdiń jaqsy uıymdastyrylýymen, sondaı-aq kelissózderdiń tabysty aıaqtalýymen quttyqtady.
Memleketter basshylary barlyq taraptyń beıbit úderisti qamtamasyz etýge jumsaǵan kúsh-jigeri Ýkraınadaǵy daǵdarysty retteýge septigin tıgizedi dep úmittenetinderin bildirdi.
Prezıdentter taıaý arada bizdiń elimizde Qazaqstan, Belarýs jáne Reseı memleketteri basshylarynyń kezdesýin ótkizý týraly ýaǵdalasty.
Telefon arqyly sóılesýge Belarýs jaǵy bastamashy boldy.
Mınskidegi kelissóz 17 saǵatqa jýyq ýaqytqa sozyldy.
Sáken Maılybaı.