Aqparat quraldarynyń qoldaýy óte mańyzdy

Elimizde daǵdarysqa qarsy der ýaqytynda sharalar júzege asyp jatyr. Elbasynyń qatysýymen ótken Úkimettiń keńeıtilgen májilisi jahandy ýysynda ustap otyrǵan daǵdarystan shyǵýdyń ishki múmkindikterin ortaǵa saldy. Negizi, elimizde daǵdarysqa qarsy baǵdarlama aldymen Elbasy Nursultan Nazarbaevtyń «Nurly Jol – bolashaqqa bastar jol» Joldaýy der edim. Qazaqstan búgingi álemde qara dara bolyp ómir súre almaıdy. Biz álemdik ekonomıkamen baılanysty úze almaımyz. Kóptegen elderdi qamtyp otyrǵan qarjy-ekonomıkalyq daǵdarystyń salqyny bizdi de sharpıtyny anyq. Sondyqtan elimiz qalyptasyp otyrǵan jaǵdaıdy shynaıy qabyldap, oǵan tıisinshe daıyn bolýy kerek. Bul oraıda, bizdiń Memleket basshysy men Úkimet kóregen, kásiptik deńgeıde is-qımyl jasap otyr. Nursultan Nazarbaevtyń saıasatker­ligi bilimmen qatar, halyq danalyǵy­nan da sýsyndaýymen erekshelenedi. Bú­gin toıyp otyryp, erteńgini oılap qoıý ­týraly ha­­­­lyqtyń eskertpe-danalyqtary jeterlik. Nursultan Ábishulynyń osy ýaqytqa deıin jınalǵan Ulttyq qordan 2015-2017 jyldar arasynda jylyna 3 mıllıard dollar qarjy bólýge jasa­ǵan sheshi­mi osyny dáleldeıdi. Bul eldi daǵ­darys­tyń shyrmaýyna túsirmeı, tyǵy­ryqtan shyǵarar basty joldyń biri bolary sózsiz. Úkimettiń keńeıtilgen májilisinde ishki múmkindikterdi paıdalanýǵa zor mán berildi. Únem máselesine kóp mán berilýde. Daǵdarys keledi, ketedi. Al halyq qalady. Daǵdarys ýaqyttyń halyqqa syny da sekildi. Sondyqtan, qıyndyqtardy judyryqtaı jumylǵanda ǵana eńseremiz. Eń aldymen, qazaqstan­dyq patrıotızm solǵyndanbaýy tıis. Jańa jumys oryndarynyń ashylýy, baryn qysqartpaı saqtap qalý istiń kózin tabýǵa baılanysty. Bizdiń elimizde ondaı múmkindikter bar. Qostanaıdyń ózinen óndiriske de, tutynýǵa da qajetti buıym­­­dar óndirilip jatyr. Syrttan keletin arzan buıymdarǵa júgirmeı, ózimizde óndirilgen ónimderdi alý namystyń, patrıottyq kelbettiń isi bolsa, qanekeı. Qazaqstan­dyq kásipkerler de, tutynýshylar da muny daǵdarystan shyǵýdyń joly dep túsine­di dep oılaımyn. Ony buqaralyq aqpa­rat quraldarynyń qoldaýy, árıne, kerek ári kóp yqpal eteri sózsiz. Osy oraıda, buqaralyq aqparat qu­raldary qyzmetkerleri men jýrna­lısterdiń kásibı biliktiligi zor mańyzǵa ıe ekeni anyq. Olar Memleket basshysynyń, Úkimettiń saıasatyn tereń túsinýi kerek. Adamdarǵa aqparat qalaı jetse, olar solaı oılanady, solaı jumys isteıdi. Ishki rýhanı, materıaldyq qýaty myqty elden daǵdarys taıǵanaqtap ketedi. Baspasóz osyǵan qyzmet etýi tıis. Sergeı HARChENKO, aımaqtyq «Kostanaıskıe novostı» gazetiniń bas redaktory. QOSTANAI.