Oıpańda otyrǵan Almatydaı emes, qyratta-aq ornalasqan Shymkent ekologııalyq ahýalymen maqtana almaıdy. Qazaqstan boıynsha avtomashınalardyń kóptiginen aldyńǵy oryndy bermeıtin oblys kólikterdiń ýly tútinine tunshyǵyp, ókpesin qolyna alardaı demiger edi. Qoǵamdyq kólikterdiń sapasy da syn kótermeıtin.
Endi mine, qalaǵa metan gazymen júretin jańa 200 avtobýs ákelindi. Shymkenttegi Ál-Farabı atyndaǵy alańda jolaýshylardy tasymaldaıtyn avtobýstardyń tanystyrylymyna oblys ákiminiń orynbasary Saparbek Tuıaqbaev pen qala ákimi Darhan Satybaldy qatysyp, sóz sóıledi.
– Avtobýstardyń jalpy quny 2,5 mlrd. teńge, – dedi Saparbek Tuıaqbaev. – Kólikterge gaz quıatyn kompressorlyq stansanyń ashylý rásimi jaqyn arada ótedi. Avtopark tolyǵymen iske qosylǵanda myńǵa tarta jumys orny ashylady. Janar-jaǵarmaımen júretin kólikterge qaraǵanda bul avtobýstar kómir qyshqyl gazyn 80 paıyzǵa deıin az bóledi.
«Green bus company» JShS alyp kelgen 120 avtobýstyń uzyndyǵy 10 metr, oryndyq sany 33, jalpy syıymdylyǵy 85 adam. Al, 80 avtobýstyń syıymdylyǵy 70 adamǵa laıyqtalǵan. Sonymen qatar, jańa avtobýstarda dıspetcherlik baqylaýdy retteý úshin GPS navıgatorlarmen jáne jolaýshylar úshin tegin WI-FI ornatylǵan.
Shymkentte búgingi tańda jolaýshylar sany 250 myń adamnan asady. Turǵyndardyń 31 paıyzy qoǵamdyq kólikterdiń qyzmetine júginedi. Jalpy, bul salada 33 kólik kompanııasy 86 baǵytta jolaýshylarǵa qyzmet kórsetýde.
Osy avtobýstarǵa arnalǵan gaz quıý beketiniń quny jeke ınvestorlarǵa 5 mln. AQSh dollaryna túsken. Bekette ornalasqan zamanaýı qurylǵylar bir mezette 8 avtobýsqa gaz quıa alady. Aıta ketý kerek, tabıǵı metan gazynyń 1 lıtri búginde 54 teńgeni quraıdy.
«Green bus company» JShS bul rette atalmysh tasymal kólikterin avtobýs shyǵarý salasynda álemde kóshbasshy bolyp tabylatyn Qytaı Halyq Respýblıkasynyń «Iýtong» jáne «Golden drakon» zaýyttarynan satyp alypty. Suıytylǵan metan gazymen júretin, ekologııalyq turǵydan alǵanda taza ári syıymdylyǵy úlken mundaı avtobýstar Shymkent qalasyna alǵash ret jetkizilgenin de ataı ketken jón. Avtobýstardyń jalpy quny 2,5 mıllıard teńgeni quraıdy. Bul úshin qajetti qarajatty seriktestikke «Qazaq Banki» AQ usynypty.
«Jańa jetkizilgen avtobýstar qalanyń ekologııalyq ahýalyn jaqsartýda tıimdi qadam bolyp otyr, deıdi «Green bus company» JShS-niń dırektory B.Kúlishev. Atalmysh jolaýshylar kóligi eki jyldyq qyzmet kórsetý kepildemesimen alyndy. Sonymen qatar, jergilikti tehnıkalyq qyzmetkerlerdi daıyndap, olardyń biliktilik deńgeıin jetildirý úshin óndirýshi zaýyttyń 5 mamany óz qolǵabysyn kórsetetin bolady».
Jańa avtobýstar marshrýttary boıynsha jumysqa kiristi.
Baqtııar TAIJAN,
«Egemen Qazaqstan».
ShYMKENT.