Qazaqstanda erekshe qajettilikteri bar azamattardyń eńbekke aralasýyn qoldaý boıynsha keshendi sharalar júrgizilip keledi. 2025 jylǵy 1 mamyrdaǵy jaǵdaı boıynsha jumyspen qamtýǵa járdemdesýdiń ártúrli sharalarymen 14,9 myńnan astam múgedektigi bar adam qamtylǵan. Jalpy búgingi tańda erekshe qajettilikteri bar 108,9 myń adam jumysqa ornalasqan, bul barlyq múmkindigi shekteýli azamattardyń 28,9%-yn quraıdy, dep habarlaıdy Egemen.kz.
Eńbek jáne halyqty áleýmettik qorǵaý mınıstrliginiń málimetinshe, elimizde múgedektigi bar azamattardyń jalpy sany 737,4 myń adamǵa jetip otyr, bul Qazaqstan halqynyń 3,7%-y. Olardyń ishinde 376,7 myńy – eńbekke qabiletti jastaǵy azamattar.
«QR Áleýmettik kodeksine sáıkes jergilikti atqarýshy organdar múgedektigi bar adamdar úshin aýyr jumystardaǵy, eńbek jaǵdaılary zııandy, qaýipti jumystardaǵy jumys oryndaryn esepke almaı, jumys isteıtinderdiń jalpy sanynyń 2-den 4% - na deıingi mólsherde jumys oryndaryna kvota belgileıdi. Osy jyldyń 1 toqsanynyń qorytyndysymen kvota boıynsha 4,8 myńǵa jýyq adam jumysqa ornalastyryldy», delingen habarlamada.
Sonymen qatar, erekshe qajettilikteri bar azamattar jumyspen qamtýǵa járdemdesýdiń belsendi sharalaryna da tartylyp keledi. 2025 jylǵy 1 mamyrǵa deıingi málimetter boıynsha:
874 adam turaqty jumys oryndaryna ornalastyryldy; 191 adam – áleýmettik jumys oryndaryna; 80 adam – jastar praktıkasyna; 3248 adam – qoǵamdyq jumystarǵa; 4 adam – «Alǵashqy jumys orny» jobasy boıynsha; 333 adam – «Kúmis jas» jobasy aıasynda jumysqa qabyldandy.Aıta keteıik, eńbek daǵdylaryn damytý baǵytynda da tıisti jumystar júrgizilip jatyr. 17 adam qysqa merzimdi kásiptik oqytý kýrstarynan ótse, 1,3 myń adam «Bastaý Bıznes» jobasy boıynsha kásipkerlik negizderine oqytyldy, olardyń 726-sy oqýdy aıaqtap, arnaıy sertıfıkattar alǵan.
Memlekettik qoldaý tetikteri aıasynda halyqtyń áleýmettik osal toptaryna, sonyń ishinde múgedektigi bar azamattarǵa óz kásibin ashýǵa 400 AEK mólsherinde memlekettik granttar beriledi. Bul bastama olardyń jeke kásibin damytýǵa úlken serpin beredi.
Budan bólek, 2018 jyldan bastap halyqaralyq tájirıbege súıene otyryp, múgedektigi bar adamdar úshin arnaıy jumys oryndaryn jabdyqtaýǵa baılanysty jumys berýshilerdiń shyǵyndaryn sýbsıdııalaý tártibi engizilgen. Bul sýbsıdııalar jumys berýshilerge arnaıy qural-jabdyqtardy satyp alýǵa, ornatýǵa jáne beıimdeýge ketken shyǵyndardy óteý úshin beriledi. Nátıjesinde búgingi kúnge deıin barlyǵy 226 arnaıy jumys orny quryldy.