«Shymkent–Tashkent» velomarafonyna júzdegen sportshy qatysty. Qalanyń Ál-Farabı alańynan jarys jolyn bastaǵan veloshabandozdar Qazaqstan–О́zbekstan shekarasyndaǵy «Jibek joly» keden beketinde máre syzyǵyn kesti. Marafonnyń araqashyqtyǵy 125 shaqyrym joldy qurady.
Velosıpedshilerdi jol polısııasy bastap júrdi. Sonymen birge jedel járdem qyzmeti sportshylardyń densaýlyǵyn baqylap otyrdy. Velomarafonnyń ashylýyna arnaıy qatysqan «Atameken» ulttyq kásipkerler palatasynyń tóralqa tóraǵasy, elimizdiń velosport federasııasynyń prezıdenti Raıymbek Batalov kelesi jyldan bastap jarys halyqaralyq deńgeıde ótetinin málimdedi.
«Shymkent–Tashkent velomarafony megapolıstiń jyl saıyn ótetin dástúrli sporttyq is-sharasyna aınaldy. Jarysty uıymdastyrýǵa qoldaý kórsetken qala ákimdigine, velosport federasııasyna, demeýshilerge aıtar alǵysym sheksiz. Velojarys tek sport emes, sporttyq mádenıet, salamatty ómir salty. Osy sport túrin órkendetip, nasıhattaý arqyly halyqtyń densaýlyǵyn nyǵaıtamyz, jastardyń velo- sportqa qyzyǵýshylyǵyn arttyramyz. Búgingi jarystan túsken qarajattyń bir bóligi qaıyrymdylyq retinde balalar úıine aýdarylady», dedi R.Batalov.
Qala ákiminiń orynbasary Sársen Quranbek te búginde memleket tarapynan sportty damytýǵa barynsha qoldaý kórsetilip jatqanyn atap ótti.
«Sonyń nátıjesinde halyqaralyq deńgeıdegi túrli jarystarda shymkenttik órender júldeli oryndardan kórinip júr. Olımpııa oıyndaryna qatysatyn ulttyq qurama sapynda da megapolıs sportshylary jeterlik. Jalpy, Shymkentte ártúrli dárejedegi sporttyq báıgeler júıeli túrde uıymdastyrylyp turady. Shaharda kóptegen sporttyq úıirme ashylǵan. Onda júzdegen bala sabaqtan tys ýaqytta sportpen shuǵyldanyp, bolashaq chempıon bolýǵa talpynady. Munyń bári megapolıstiń sporttyq áleýetiniń joǵary ekenin baıqatady», dedi S.Quranbek.
Issapar barysynda R.Batalov elimizdiń jeńil atletıka federasııasynyń vıse-prezıdenti Olga Rypakovamen birge qala ákimi Ǵabıt Syzdyqbekovpen kezdesip, megapolıste velosport pen jeńil atletıka sportyn damytý jóninde keńesti. Sondaı-aq álemdik «Gran Fondo» shosselik velosaıysyn Shymkent qalasynda ótkizý múmkindigin saralady. Bul jarysqa shahardyń ınfraqurylymy tolyq sáıkes keledi. Shymkent – halyqaralyq saıystardy uıymdastyrýda tájirıbesi bar qala. Sonyń bir aıǵaǵy – byltyr ótken álemdik shahmat saıysy. Sol sekildi halyqaralyq marafon men velojarystardy Shymkentte uıymdastyrýǵa da tolyq múmkindik bar.
ShYMKENT