Pavlodar qalasyndaǵy Dańq Obelıski men Máńgilik alaýdyń janynda beıádep bı bılegen eki jasóspirimge aıyppul salyndy. Bul týraly Pavlodar qalasynyń ákimshilik quqyq buzýshylyqtar jónindegi mamandandyrylǵan aýdanaralyq soty málimdedi, dep jazady Egemen.kz.
Oqıǵa 2025 jylǵy 2 mamyr kúni saǵat 16:00 shamasynda tirkelgen. 2008 jáne 2009 jyly týǵan kámeletke tolmaǵan J. men I. esimdi qyzdar uıatsyz bı bılep, ony beınejazbaǵa túsirgen. Áleýmettik jelide beınerolık «Saıabaqty qorlaımyz» degen orynsyz jazýmen jarııalanǵan.
Sot otyrysynda oqýshylar kinálaryn tolyq moıyndap, vıdeony TikTok-taǵy trendke eliktep túsirgenderin aıtqan. Azamatsha J. túsirilimge horeograftyń shaqyrýymen qatysqanyn, al I. Jeńis kúnin atap ótýdi kózdegenin jetkizgen. Alaıda, olardyń bul áreketi qoǵamnyń synyna ushyrady.
«Sot usynylǵan materıaldardy qarap, kámeletke tolmaǵan J. jáne I.-di ákimshilik quqyq buzýshylyq jasaǵandary úshin kináli dep tanyp, árqaısysyna 10 AEK 39 320 teńge mólsherinde ákimshilik aıyppul túrindegi ákimshilik jaza taǵaıyndady», delingen habarlamada. Sot qaýlysy áli zańdy kúshine engen joq.