Talǵamy mol tanymdyq shara

Kókshetaý qalasyndaǵy Áde­bıet jáne óner mýzeıinde Qazaq handyǵynyń 550 jyldyǵyna oraı kórme uıymdastyryldy. Kórme jumysyn mýzeı dırektory Nurbek Nuralın ashyp, taǵylymdyq is-sharanyń basty maqsatyna toqtalyp, onyń máni men mańyzy jaıly keńinen áńgimelep berdi. Kórkemsýret akademııasynyń korrespondent-múshesi, tanymal sýretshi Dýlat Qospanov, Sýretshiler odaǵynyń músheleri Iýrıı Popov, Magomed Kokýrhoevtyń kartınalary kórermen nazaryn baýrap aldy. Ásirese, Dýlat Qospanovtyń «Oqjetpes», «Qarasaı batyr men Aǵyntaı batyr», «Qyz qýý» atty kartınalary qazaq halqynyń ótken tarıhyn beıneleıtin tamasha týyndylar retinde baǵalandy. Tarıhı obrazdarǵa toly týyndylarda qazaqtyń qaısarlyǵy, qarapaıymdylyǵy, ójettiligi, órligi, keńdigi aıshyqty beınelengen. Al, qoldanbaly óner sala­syndaǵy belgili músinshi Iýrıı Popovtyń «Pod golýbym nebom», «Starsy», «Dervısh. Blagaıa vest» atty shyǵarmalaryn erekshe atap ótýge bolady. Avtordyń qum men sazdyń kúı­dirilgen qosyndysynan jasaǵan músinderi de birinen biri ajarly, mazmundy ekendigin aıtý kerek. Sondaı-aq, ónersúıer qaýym Magomed Kokýrhoevtyń «Tulpar qanaty», «Úsh apaly-sińlili» kartınalary da shynaıy obrazdarǵa toly tamasha týyndylar. Maıly boıaýly sýretter bir birimen úılesim tapqandaı. Qyl­qalam sheberleriniń kartınalaryn oqýshylar qyzyǵa tamashalady. Kórme barysynda Qazaqstan Respýblıkasy Sýretshiler odaǵy­nyń múshesi Dýjan Maǵzumovtyń da «Tań sári», «Úndestik», «Túr­ki» shaǵarmalary jurtshylyq talǵamynan shyqty. Máselen, «Tań sári» polotnasynda qyzyl jáne kók boıaýlardy qoldanǵan sheber kompozısııalyq tutastyqty utymdy kórsete bilgen. Taǵy bir aıta keterligi, kórme barysynda qonaqtardy atalmysh mýzeıdiń ǵylymı qyzmetkeri Gúl­zaıra Sábıtova jádigerler za­lymen tanystyrdy. Munda qa­rý-jaraqtar men er-turman, áshe­keı buıymdar, qoljazbalar, qaz­ba jumystary barysynda tabyl­ǵan quty men 500 jyldyq tarıhy bar saptaıaq qoıylypty. Ási­rese, sal-seriler buryshynda Aqan seri ardaqtaǵan Aqtoqtynyń Jal­muqannan týǵan balasy Sul­tannyń dombyrasy, sondaı-aq, Aqtoqtynyń «Zınger» tigin mashınasyna oqýshylar qyzyǵýshylyq tanytty. Sondaı-aq, kıiz úı bu­ry­shyndaǵy ásem turmystyq buı­ymdar kóz jaýyn alady. Munda da Sýretshiler odaǵynyń múshesi Ibragım Isenovtiń kartınalary qatysýshylardyń qyzyǵýshylyǵyn týdyrdy. Qazaq handyǵynyń 550 jyl­dyǵyna oraı uıymdastyrylǵan sýretshilerdiń kórmesi bir aı boıy jurtshylyqtyń nazaryna usy­nylatyn bolady. Baqbergen AMALBEK, «Egemen Qazaqstan». Aqmola oblysy. Sýretti túsirgen Tólegen QOSShYǴULOV.