Premer-mınıstrdiń orynbasary Ermek Kósherbaevtiń tóraǵalyǵymen kámeletke tolmaǵandardyń qaýipsizdigin qamtamasyz etý, olardyń quqyqtaryn qorǵaý jáne quqyq buzýshylyqtyń aldyn alý máseleleri boıynsha keńes ótti. Jıynda sondaı-aq zorlyq-zombylyqtyń, býllıngtiń aldyn alý jáne balalardyń jazǵy demalysyn qaýipsiz uıymdastyrý sharalary qaraldy.
Keńes barysynda balalarǵa qatysty qylmystardyń aldyn alýǵa baǵyttalǵan memlekettik organdar qabyldap jatqan júıeli sharalar talqylandy. Ásirese kámeletke tolmaǵandarǵa qatysty seksýaldyq sıpattaǵy qylmystar úshin jaýapkershilikti kúsheıtýge, profılaktıkalyq jumysty jandandyrýǵa jáne balalar arasynda qaýipsiz minez-qulyq mádenıetin qalyptastyrýǵa baǵyttalǵan zańnamalyq ári ınstıtýsıonaldyq ózgeristerge basa nazar aýdaryldy.
«Ákimdikter bul jumysqa belsendi aralasýǵa tıis. Ata-analarmen jáne ustazdarmen túsindirý jumystaryn júrgizip, mektep jáne medısına psıhologterimen tyǵyz baılanys ornatýy qajet. Sonymen qatar jazǵy saýyqtyrý maýsymyna daıyndyqty únemi baqylaýda ustaý kerek. Balalar quqyqtary jónindegi ýákilder ınstıtýtymen júıeli jumys júrgizý mańyzdy. Onyń qyzmeti tek áreket etýge emes, aldyn alýǵa da baǵyttalýǵa tıis. Biz balalardyń ómirine qaýip tónýine jol bere almaımyz, barlyq ýákiletti organdar aldyn ala áreket etýi qajet», dedi E.Kósherbaev.
Balalardyń jazǵy kezeńdegi qaýipsizdigin qamtamasyz etý boıynsha profılaktıkalyq sharalar aıasynda keshendi jumystar júzege asyrylyp jatyr. Kámeletke tolmaǵandardyń jynystyq qolsuǵylmaýshylyǵyna qarsy qylmystar úshin qylmystyq jaýapkershilik kúsheıtildi. Býllıng úshin jáne 16 jasqa deıingi balalardy qoǵamdyq kólikten kúshtep túsirý jaǵdaılaryna baılanysty ákimshilik jaýapkershilik engizildi. 58 myńnan astam zańsyz ınternet-resýrs, onyń ishinde balalardy zańsyz áreketterge tartý belgileri bar 11 arna buǵattaldy.
«Árbir tórtinshi jol-kólik oqıǵasy balalardyń qatysýymen oryn alady. Sondyqtan biz balalardy tasymaldaıtyn barlyq avtobýsty tekserýdi kúsheıttik. Qajet bolǵan jaǵdaıda polısııa avtobýsqa da jol boıy ilesip júrýge daıyn», dedi Ishki ister mınıstriniń orynbasary Igor Lepeha.
Ermek Kósherbaev erekshe bilim berý qajettilikteri bar, múmkindigi shekteýli balalardyń, sondaı-aq jetim jáne ata-anasynyń qamqorlyǵynsyz qalǵan balalardyń jazǵy demalysqa tolyqtaı qamtylýy mańyzdy ekenin aıtty. Osy maqsatta óńirler arasynda yntymaqtastyq uıymdastyrylady: balalar kıeli jerler men tarıhı oryndarǵa saıahattap, túrli shyǵarmashylyq jáne tanymdyq jazǵy jobalarǵa qatysady. Bul rette balalardyń ómiri men densaýlyǵy jolda da, demalys ornynda da tolyqtaı qorǵalady.
Keńes qorytyndysy boıynsha vıse-premer barlyq ýákiletti memlekettik organdarǵa vedomstvoaralyq úılestirýdi kúsheıtýdi, jazǵy kezeńge josparlanǵan sharalardyń oryndalýyn qatań baqylaýdy jáne balalardyń quqyqtary men qaýipsizdigin qamtamasyz etýge baǵyttalǵan jańartylǵan keshendi jospardy Úkimetke usynýdy tapsyrdy.