Astanada ortalyq memlekettik jáne jergilikti atqarýshy organdardyń baspasóz hatshylaryna arnalǵan «Halyqpen tıimdi kommýnıkasııa úshin jasandy ıntellekt» atty semınar-praktıkým ótti. Úsh kúnge jalǵasqan is-sharada qatysýshylar zamanaýı sıfrlyq múmkindikterdi paıdalaný arqyly memlekettik qurylymdar men azamattar arasyndaǵy ózara baılanysty jetildirý joldaryn talqylady. Basty nazar qoǵammen baılanys sapasyn arttyrýǵa, ashyqtyqty qamtamasyz etýge jáne aqparatqa qoljetimdilikti keńeıtýge baǵyttaldy, dep habarlaıdy Egemen.kz.
Semınardyń ashylýynda Astana memlekettik qyzmet habynyń Basqarýshy komıtet tóraǵasy Álıhan Baımenov memlekettik saıasatty túsindirýde baspasóz qyzmetteriniń sheshýshi rólin atap ótip, baspasóz hatshylarynyń JI sııaqty zamanaýı sıfrlyq quraldardy meńgerýiniń qajettiligine toqtaldy. Is-shara barysynda qatysýshylar mátinder men beınematerıaldar qurastyrý, qoǵamdyq pikirdi taldaý jáne kúndelikti jumysty avtomattandyrý boıynsha JI qoldanýdaǵy praktıkalyq daǵdylaryn shyńdady.
Grýzııalyq sarapshylar Anı Sırbıladze men Iraklı Gvınıanıdze baspasóz qyzmetterine jedel baspasóz habarlamaryn ázirleýge, áleýmettik jeliler úshin mazmundy beınerolıkter men kórneki kontent jasaýǵa múmkindik beretin qarapaıym ári tıimdi quraldardy tanystyrdy. Sondaı-aq, semınarda JI tehnologııalaryn qoldanýdaǵy etıkalyq jáne quqyqtyq máselelerge, memlekettik aqparat qaýipsizdigine de nazar aýdaryldy.
Qatysýshylar semınarda alǵan bilimderi memlekettik organdar men qoǵam arasyndaǵy kommýnıkasııany barynsha túsinikti, ashyq jáne qoljetimdi etýge kómektesetindigin aıtty. Jıyn qorytyndysynda memlekettik kommýnıkasııa salasynda JI qoldanýǵa qatysty halyqaralyq trendter men praktıkalyq usynystar qamtylǵan sıfrlyq nusqaýlyq jasalyp, qatysýshylarǵa usynyldy.
Semınar Astana memlekettik qyzmet haby bastamasymen Memlekettik qyzmet isteri agenttigi, Mádenıet jáne aqparat mınıstrligi, Prezıdent janyndaǵy Memlekettik basqarý akademııasy jáne BUU Damý baǵdarlamasymen birlese uıymdastyrylǵan.