ASTANA. 13 aqpan. Soltústik Qazaqstan oblysy Tahtabrod aýyldyq okrýgi ákiminiń ólimine kúdikti adam ustaldy. Bul týraly oblystyq ishki ister departamenti baspasóz qyzmetiniń deregine súıengen Tengrinews.kz tilshisi habarlady.
Boljam boıynsha ákim 6 aqpanǵa qaraǵan túni kisi qolynan qaza tapqan.
Quqyq qorǵaý organdary aýyl ákimi Qaırat Ǵalymjanovtyń máıiti tabylýyna baılanysty «Kisi óltirý» baby boıynsha qylmystyq is qozǵady.
Jasalǵan jedel-zertteý jumystarynyń nátıjesinde kisi óltirýge kúdikti retinde 1951 jyly týǵan er kisi ustalyp, ýaqytsha oqshaýlaǵyshqa qamaldy. Qazir qylmystyń mán-jaıy anyqtalyp jatyr. Osyǵan qatysty birneshe saraptama taǵaıyndaldy.
Tahtabrod aýyly ákimdiginiń ókilderi Qaırat Ǵalymjanovtyń janazasy keshe, 12 aqpan kúni Kókshetaýda shyǵarylǵanyn jetkizdi. Qazir onyń mindetin Ásel Qasymova ýaqytsha atqarýda.
Aıta keteıik, Qaırat Ǵalymjanov 2014 jyldyń qarasha aıynda ákim bolyp taǵaıyndalǵan.
Buǵan deıin mundaı oqıǵa Ekibastuz qalasynda oryn alǵan edi. 2008 jyldyń mamyr aıynda qaladaǵy «Asyl» bazary mańynda óziniń Toyota Land Cruiser avtokóligine otyrǵaly jatqanda, Ekibastuzdyń burynǵy ákimi Ramazan Jumataevty belgisiz bireýler atyp ketti. Oqıǵa ornynan jeti gılza tabyldy. Tergeý barysynda qalanyń eks-ákiminiń ólimine kúdikti retinde tórt adam - Serik Muqantaev, Álıhan Isın, Ernar Bıjumenov jáne oblysqa belgili kásipker Baýyrjan Muqantaev ustaldy.
Ekibastuz qalasy eks-ákiminiń ólimi úshin Serik Muqantaev 15 jylǵa bas bostandyǵynan aıryldy. Ol «Bazarskıe» uıymdasqan qylmystyq tobynyń jetekshisi bolǵan. Polıseıler birneshe jyl boıy onyń sońyna túsip kelgen. Ol 2013 jyldyń sáýir aıynda Almatyda ustalyp, Pavlodarǵa jóneltildi.
Qurysh Nurymbet.
Derek, foto: Tengrinews.kz.