ASTANA. 13 aqpan. Astana qalasynyń áýejaıynda sáýir aıynan bastap resmı taksı jumys jasaı bastaıdy. Bul týraly «Qazaqstan» telearnasy habarlady.
Arna tilshisiniń málimetinshe, azamattyq avıasııa komıteti, áýejaı jáne Astana qalasynyń ákimdigi, sondaı-aq kóliktegi ishki ister departament jáne basqalardyń qatysýymen ótken keńestiń qorytyndysy boıynsha osyndaı sheshim qabyldanǵan.
«Astana» áýejaıy» ashyq aksıonerlik qoǵamynyń tóraǵasy Beken Seıdahmetov osy mindetterdi iske asyrý maqsatynda Investısııalar jáne damý mınıstrligi áýejaıdaǵy zańsyz qyzmet kórsetip júrgen taksısterdiń jumysyn toqtatý josparyn ázirlegendigin atap ótti.Atalmysh josparda taksısterdiń zańsyz qyzmet kórsetýin tyıýǵa baǵyttalǵan qosymsha sharalar belgilengen. Endi mundaǵy syrttan kelip jatqan jolaýshylardy tasymaldaıtyn taksomotor parki konkýrstyq negizde anyqtalady.
Taksıdi áýejaıdyń shekteýli múmkindigi bar aýmaǵynan shyqpaı shaqyrtýǵa bolady. Resmı taksıdiń qyzmeti jóninde avıajolaýshy ushý kezinde habardar etiledi. Áýejaı ǵımaratynda qalanyń shemasy, aýdandar jáne aıaqqy núktege deıin jetýdiń biryńǵaı quny jaıynda qysqa aqparat ornalasqan bannerler qoıylady.
«Biz jolaýshynyń qaýipsizdigin eń basty orynǵa qoıamyz. Iаǵnı onyń qaýipsizdiginiń aldyn alý men qaýip-qaterden saqtandyrý, taksomotorlyq qyzmet sapasyn qamtamasyz etý - bizdiń basty mindetimiz bolyp sanalady. Astyrtyn tasymaldaýshylardyń qyzmet kórsetýinen astanalyq áýejaıdyń, qalanyń kireberisindegi basty aınasy retindegi ımıdji nasharlaıdy. Astanalyq jáne basqa áýejaılardaǵy mundaı jaǵdaıǵa múldem jol berýge bolmaıdy», - dep atap kórsetti Beken Seıdahmetov.
Sonymen birge, azamattyq avıasııanyń halyqaralyq uıymy (IKAO) áýejaılar áýejaı men qala aralyǵyndaǵy qaýipsiz jáne jedel kólik baılanysynyń barlyq talaptaryna saı bolýyn talap etýde ekendigin atap ótken.
Murat Aıtqoja.
Derek, foto: «Qazaqstan» telearnasy.