ASTANA. 13 aqpan. Qazaqstan, Reseı jáne Belarýs Prezıdentteri taıaý kúnderde endi Astanada kezdesedi. Bul týraly Aqordanyń málimetine silteme jasaǵan egemen.kz tilshisi habarlady.
Áńgime Belarýs basshysy Aleksandr Lýkashenkonyń Qazaqstan lıderi Nursultan Nazarbaevqa keshe telefon soqqan kezinde kóterildi. Lýkashenko óziniń sózinde Reseı, Ýkraına, Fransııa Prezıdentteriniń jáne Germanııa Kansleriniń Mınskide «normand formatynda» ótkizgen kelissózderiniń qorytyndylary týraly aıtyp berdi.
Qazaqstan Prezıdenti ózin habardar etkeni úshin oǵan alǵys bildirdi jáne kezdesýdiń jaqsy uıymdastyrylýymen, sondaı-aq kelissózderdiń tabysty aıaqtalýymen quttyqtaý lebizin jetkizdi.
Memleketter basshylary barlyq taraptyń beıbit úderisti qamtamasyz etýge jumsaǵan kúsh-jigeri Ýkraınadaǵy daǵdarysty retteýge septigin tıgizedi dep úmittenetinderin bildirdi.
Prezıdentter taıaý arada bizdiń elimizde Qazaqstan, Belarýs jáne Reseı memleketteri basshylarynyń kezdesýin ótkizý týraly ýaǵdalasty.
Sáken Maılybaı.