Jazdyń shýaqty kúnderi jaqyndap keledi. Demalys, teńiz, qum... Balalyqtyń tátti estelikteri qaıta jańǵyryp, jaǵalaýdaǵy eski bir sátter eske túsedi. Qulaqqa taqalǵan ulý qabyǵynan estiletin jumbaq dybys — shyn máninde neni bildiredi?
Teńiz jaǵalaýyna baryp, qumda otyryp, qolyńyzǵa bir ulý qabyǵyn alyp, qulaǵyńyzǵa taqap tyńdaǵan sátińiz bolǵan shyǵar. Estilgen jumbaq ún — kishkentaı kezden tanys, erekshe dybys. Ádette bul tolqynnyń úni dep qabyldaımyz. Biraq bul dybys rasymen teńizden kelip tur ma?
Ǵalymdar bul ańyzdy joqqa shyǵarady. Ulý qabyǵynyń ishindegi «teńiz úni» dep júrgenimiz — aınalamyzdaǵy álsiz dybystardyń shaǵylysýy men óz aǵzamyzdaǵy qan aınalymynyń áseri. Ulý qabyǵy — kúrdeli pishindi qýys dene. Ol syrttaǵy bolmashy dybystardy kúsheıtip, rezonans jasaıdy. Siz tynysh bólmede nemese tabıǵat aıasynda bolǵanda, bul dybystar odan ári aıqyn seziledi.
Qulaq mańyndaǵy qan tamyrlarynan aǵyp jatqan qannyń qozǵalysy — sol ulý qabyǵynda kúsheıip estiletin negizgi dybys. Ol úzdiksiz, birqalypty, terbelip turady. Osy sebepten de ol bizge teńizdiń tolqyny tárizdi áser qaldyrady. Shyndyǵynda, bul — sizdiń óz deneńizdiń úni.
Biraq bul qubylystyń sıqyryn buza ma? Joq, kerisinshe. Ulý qabyǵyn tyńdaý — adamnyń óz ishine úńilýiniń bir formasy. Bul tabıǵat pen adamnyń arasyndaǵy únsiz, biraq berik baılanys ispetti. Ol sizdiń ómir súrip jatqanyńyzdy, aǵzańyzdyń toqtamaı jumys istep jatqanyn eske salady. Kelesi joly teńiz jaǵalaýynda ulý qabyǵyn qulaǵyńyzǵa aparyp tyńdaǵan kezde, bul dybystyń muhıttan emes, óz ishińizden kelip jatqanyn bilińiz. Bul — sizdiń ómirińizdiń únsiz sybyry. Tabıǵattyń tylsym syıy arqyly óz tirshiligińizdiń únimen qaýyshý múmkindigi.
Janel TО́LEÝBEKOVA, EUÝ stýdenti