ASTANA. 13 aqpan. Tennısshi Marııa Sharapova Federasııa Kýbogy úshin bolatyn jartylaı fınaldyq kezdesýde Reseı quramasy sapynda oınaýdan bas tartty. Bul týraly TASS habarlady.
Sportshy muny óziniń Shtýtgartta ótetin áıelder tennısi assosıasııasy (WTA) týrnırine qatysatynymen baılanystyrdy. Reseı tennıs federasııasynyń prezıdenti Shamıl Tarpıshev TASS tilshisine osylaı dedi. «Ol ótken jyly Shtýtgarttaǵy týrnırde jeńiske jetken bolatyn. Sondyqtan bul joly óziniń jeńip alǵan upaılaryn qaıta dáleldeýi kerek. Al bul eki jarys bir-birimen qatarlas kelip qalyp tur», - dep túsindirji ol.
Sharapova Federasııa Kýbogynyń 7-8 aqpan kúnderi Polsha quramasymen ótken shırek fınaldyq kezdesýinde Reseı komandasy sapynda óner kórsetken edi. Ol sonda apaly-sińlili Ýrsýla jáne Agneshka Radvansalardy kezek-kezek utyp, qurama eki upaı alyp berip, onyń jartylaı fınalǵa shyǵýyna kómektesken bolatyn.
Reseılikter endigi jartylaı fınaldyq matchta 18-19 sáýir kúnderi nemistermen ótkizedi. Kelesi jartylaı fınaldyq jupta fransýz jáne cheh qyzdary ushyrasady.
Aıta ketetin jaıt, Marııa Sharapova qatysýǵa nıet etip qoıǵan Shtýtgart týrnıri 20 sáýirde bastalady. Al WTA týrnırinde óner kórsetý oǵan uıymnyń reıtıngisinde amerıkalyq Serena Ýılıamstan keıingi ekinshi ornyn saqtap qalý úshin aýadaı qajet.
Damır Qojamqul.
Derek, sýret: TASS.