Eldik sheńberinen shyǵyp, sán áleminiń halyqaralyq minberine aınalǵan EURASIAN FASHION WEEK FW 25/26 bıyl tosyn syılar men tamasha jańalyqtarǵa toly boldy. Bıylǵy maýsymnyń taqyryby – Fluidum – dáýirler tezinen shyqqan kórkem álemniń úzdiksiz qımyly men ıkemdiligin pash etip, genderlik shekteýler men mádenı shekaralardy buzǵan erkindik sımvoly ispetti boldy. Bul jáı ǵana moda emes – sán álemin óner, bıznes pen áleýmettik platforma retinde tanyta alatyn, talantty dızaınerlerdiń baǵyn ashatyn alań desek te bolady, dep habarlaıdy Egemen.kz.
Aıtýly oqıǵa retinde aıshyqtalǵan EURASIAN FASHION WEEK-tiń 9-maýsymyna 3 000-daı adam qatysyp, BAQ ókilderi men ınflıýenserlerdi, iskerlik álemi sán ındýstrııasynyń sheteldik jáne otandyq ókilderin jınady.
Almaty tórindegi saltanatty «Koktobe Hall» saraıynda ótken «EFW 2025» syılaǵan jarqyn sátterdi tilge tıek etetin bolsaq, ázerbaıjandyq brendtiń ıesi Anara Zakirli alǵash ret eurasian minberinde saltanat qurdy. Ol 2018 jyly ulttyq kilem órnekterin zamanaýı kıim úlgilerimen úılestirip, árbir sán úlgisin tarıhtyń, mádenıet pen tabıǵattyń (ot, sý, aýa, jer) nyshanyna aınaldyra bilgen daryndy dızaıner.
BAQ ókilderine arnalǵan EFW bas prodıýseri Irına Baıjanova: «Biz úshin kórshi elderden kelgen dostarymyzdy EFW sahnasynda qarsy alý –úlken mártebe. Ázirbaıjan eliniń júregin jaýlaǵan brendti óz elimizde tanystyrýdyń sáti kelgenine qýanyp otyrmyz. Osylaısha Anara Zakirli brendiniń jańa taraýlary Qazaqstanda ashylyp otyr», dedi.«Bıylǵy maýsymnyń taǵy bir ereksheligi erekshe kútimdi qajet etetin balalar moda minberine shyǵyp, sán úlgilerin kórsetti. Osy sátter olarǵa qýanysh syılap qana qoımaı, kıip kórsetken sándi kıim úlgilerin ózderinde estelikke qaldyrdy. Eń bastysy onkologııalyq derttermen, qan aýrýlarymen kúresip júrgen balalar qýanyshtan kúsh-qýat aldy, erekshe sátterdiń bir bólshegine aınaldy.
«Bıylǵy maýsymdy balalar kórsetiliminen bastasaq – bul sanaly túrde qabyldanǵan sheshim. Bizge sán áleminiń – shabyttandyra alatyn, qoldaý kórsetip, biriktire alatyn kúsh ekenin kórsetý mańyzdy. EFW maqsaty ádette kadr syrtynda qalyp qoıatyndardy kórsetý. Erekshe qajettiligi bar balalar minberge shyqqan kezde sán – jáı ındýstrııa ǵana emes, ózgeris quralyna aınalyp shyǵa keledi. Bul kórsetilimder bizdiń áleýmettik jobalarymyzdyń bir bólshegi, árbir balanyń tanymal dızaınerden alǵan syılyǵy – olardyń osyǵan laıyq ekendigin sezindiredi», deıdi Irına Baıjanova.
Sondaı-aq EFW-tiń bıylǵy maýsymynda BEYNE, Malique, Adi Distance musylmandyq brendteri alǵash ret sahnaǵa shyǵyp, zamanaýı musylman áıelderiniń kelbeti men stılin kórsetti.Al Sun Sergio, Tasha Kazantseva, Rose & Boujee, ShakerBay, Kenje Devıatko (Lacrimosa toptamasy), Bayan Sabazova, Arai Bektursun (etnıka jáne turaqty moda sıntezi), Zero syndy brendter kórermenderdiń erekshe iltıpatyna bólendi.Jurttyń nazaryn aýdarǵan Ethno Fashion Show EFW-di márege jetkizip, MYRZA, Gulnara Kassym, Gulnaz Zheksembek, POLYRMORT brendteri etnıka men turaqty sán úlgileriniń úılesimin tanytty.
Moda áleminiń mıssııasy da sonda – otandyq sán álemindegi aıshyqty kúnderdi MOD (Halyqaralyq kóshi-qon uıymy) men Models Production seriktestigimen áıelderge tiginshilik óner men kásipkerlikke baýlý baǵdarlamasy jalǵasyn tabatyndyǵymen qorytyndylaýǵa bolady. Qazirdiń ózinde 100-den astam áıel kásip bastaýǵa múmkindik alyp otyr.